› 選擇地區
三藩市
紐約
洛杉磯
其他美國地區
香港 台灣 北美
 
2014年06月05日

【七筆思議】
鄒四的夢幻之旅:飛虎 - 鄒凱光

看到真正的飛虎隊,心裏有一份不敢宣諸於口的感覺。

我不是「警匪片」的fans,我對警隊的認識,就只有軍裝與CID,後來才知道還有重案組及緝毒科,如果不是因為看了陳嘉上導演96年拍的《飛虎》,我可能到現在仍未知道有「飛虎隊」存在!所以我認為《飛虎》不單是陳嘉上導演至今至有型的作品,《飛虎》更奠定了普羅大眾一個概念,「飛虎隊」的成員個個都似王敏德咁型,媾嘅女都似李若彤咁索,而由於從來冇人見過真「飛虎隊」成員的樣子,呢個概念一直沿用到上年!直至《飛虎出征》出現,把「飛虎隊」成員以一個全新手法包裝,讓觀眾可以有更多的選擇,「飛虎隊」除了有王敏德、余文樂咁靚仔又有型,亦有像阿澤、曾國祥及我的類型!但話雖如此,彭浩翔當日找我演出時,我的第一個直接反應是:「幾好笑吖!入正題喇!搵我咩事?」,「我真係搵你演飛虎隊員呀!」我依然無法相信,於是我反問阿彭:「你真係覺得我似飛虎隊?!又冇王敏德咁型!我得個高字㗎咋,唔fit又唔靈活㗎?!」阿彭以一貫導演的口吻回應我:「型唔型,靈唔靈活就拍出嚟嘅箒,着住套制服,唔fit都變好fit喇!」
電影出街後,我有一位朋友F致電給我,劈頭第一句就鬧:「我以為《飛虎出征》最後會揭盅,其實你哋全部係有精神病,以為自己係飛虎隊,跑返去果度唔係總部,而係精神病院!」我其實覺得呢個結局不俗,但見朋友F來勢洶洶,絕非善意,於是我冷冷地送上了一個爛gag:「片名就叫《飛虎瘋人院》!」對方冷冷的一笑:「好好笑呀!不過都好笑唔過一班完全唔似飛虎隊嘅人喺度話自己係飛虎隊……囉!」我禮貌地反問對方:「其實你有見過真正飛虎隊成員嗎?你肯定個個都係王敏德咁款?!你肯定全地球上,冇幾個係咁款同咁身手嘅飛虎隊?」朋友F騎虎難下,以鐵一般的語氣回答我:「我肯定!我肯定任何一個飛虎隊成員,都係好有型!」

飛虎隊真面目

上星期日我從電視的新聞直播中,看到真正的飛虎隊成員,看到真正飛虎隊的行動過程,我心裏有一份不敢宣諸於口的感覺,直至我看到朋友F在facebook上的status,我釋懷了!
「可能睇慣電影裏面啲飛虎隊,見到真正嘅飛虎隊行動之後,我覺得……其實《飛虎出征》嗰幾件原來都算型!」
我尊重也感激每一位除暴安良的警隊成員,但我從不覺得他們是英雄,都只是電影把人與事都英雄化而已,說到底他們都只不過是「打份工」,沒有王敏德般有型不打緊,盡忠職守就足夠了!

【鄒四的夢幻之旅】
撰文:鄒凱光

集編劇、導演、演員、主持於一身的中年漢,有着男人的浪漫。

本欄逢周四刊登

【壹錘定音】星期一至五,早上8點開咪!
http://hk.apple.nextmedia.com/livestream/channel/lishow

立即更新Android《蘋果動新聞》app
https://bitly.com/appledailyandroidapp

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載