› 選擇地區
三藩市
紐約
洛杉磯
其他美國地區
香港 台灣 北美
 
2014年06月08日

暗示被迫走
陳自強數臭成龍走火入魔

經理人跟藝人關係唇齒相依,成龍七十年代全靠伯樂陳自強捧紅,兩人38年合作無間,但突於08年結束賓主關係,當中因由一直成謎。昨日商台節目播出陳自強錄音訪問,過去不時為成龍遮風擋雨的陳自強,竟批評成龍走紅後「走火入魔」,陳自強言語間又暗示被人迫走。陳自強離場,成龍大小事務即由其妻林鳳嬌接掌。

相關新聞:講個信字:情如兄弟 唔使合約

七十年代寂寂無聞的成龍,全靠伯樂陳自強推薦給電影人羅維,參演電影《新精武門》後再接拍吳思遠監製電影《蛇形刁手》。成龍走紅後,陳自強挖走成龍自立門戶,助武師出身的他登上大銀幕,演藝創出高峯,兩人合作38年。08年陳自強突然宣佈離開,成龍的事務即由老婆林鳳嬌接手管理,二人關係由密變疏。昨日商台節目播出陳自強錄音訪問,他力數成龍走火入魔,令他無奈引退。

身邊大官富豪多

訪問中,陳自強表示透過秦祥林認識成龍,兩人沒簽過一紙合約,關係如兄弟,他說:「我哋有粥食粥,有飯食飯。佢叫我brother,佢話自己唔識字,叫我幫手睇文件同劇本,幫佢分析。當年佢話『我唔會唔養你,我唔會唔理你』。」
不過融洽關係於6年前畫上句號,陳自強大爆內幕:「慢慢佢紅到有啲走火入魔,已經唔再需要我幫,我又冇乜嘢可以幫到佢,同枱有好多大官,一係大有錢人同yes man,我嘅嘢唔再入耳,好多人想入我個位,有我喺度真係好煩,我知道好多人想take over個位,不如自己瀟灑啲離開,好過俾人話終於被逼出嚟。」
問到結束合作是否可惜?陳自強續說:「真係好可惜,過去37、38年,佢由一句英文唔識,由我拖住佢,監佢上飛機,唔止係佢屋企嘢,仲係全個家庭,由祖名出世,到喺美國搵屋畀嬌姐(林鳳嬌)佢哋住。」陳自強言語間不乏欷歔。雖然成龍剛過去的60大壽,陳自強都畀面出席,陳自強說:「大家冇尷尬,唔係殺父仇人。」陳自強辭任後,即由林鳳嬌處理成龍大小事務,她尤其看重所有數目。
99年成龍爆出吳綺莉懷龍種事件,成龍失言道出:「我犯了天下男人都會犯的錯。」陳自強否認當年曾聯絡吳綺莉講數,他回憶成龍失言:「當時好多軍師,最初用意係想講聖經中有女子被人用石頭掟死嘅古仔,想話好多男人會犯錯,點知佢講咗『天下男人都會犯的錯』,我哋都愕然。」陳自強至今仍自豪捧紅成龍,最近他又助契仔徐君俊開展時裝事業。陳自強說:「對目前生活幾滿意,笑嘅時候多過流眼淚。」

相關新聞:傾唔掂數:關係破裂

否認被嬌姐踢走

記者昨日致電陳自強,他說:「每個人紅咗都難免『走火入魔』,調返轉頭我都會,我哋合作時都有拗撬,但開心時間多,我當年離開真係唔可以進一步幫到佢,佢會有新前途。」陳自強否認被林鳳嬌迫走,他說:「嬌姐同祖名至今對我都好好。」成龍昨日在海口出席電影公司晚宴,未有接受傳媒訪問。
此外,成龍除跟陳自強結束經理人關係,其實早年他先後怒炒跟他15年的成家班成員盧惠光及段偉倫。有指成龍不滿段偉倫經常將他行蹤掛嘴邊,令緋聞多多的成龍非常避忌,02年段偉倫抗旨不肯為成龍做跑腿送衫成炒魷導火線。林鳳嬌取代陳自強揸旗後也叮走盧惠光,盧惠光當年哭訴遣散費不夠10萬。
採訪:劉敏

【壹錘定音】星期一至五,早上8點開咪!
http://hammerout.hk

立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載