› 選擇地區
三藩市
紐約
洛杉磯
其他美國地區
香港 台灣 北美
 
2014年06月09日

戰勝胃癌 又患腸炎
71磅司馬燕今再入院

【太古城】現年51歲的司馬燕自前年患上胃癌,康復後身體仍然孱弱不堪,體重由過去100磅跌到得71磅,骨瘦嶙峋。雖然抗癌成功,但畢竟這場大病引爆出不少後遺症,過去兩年病魔與她如影隨形,慶幸司馬燕每關都大步檻過,今年初才在體內駁上人工尿管,近日又腸抽筋發作,醫生估計是腸炎,她今日要再進院做檢查。

相關新聞:病歷表:受盡煎熬

娛圈抗癌勇士司馬燕,前年年底不幸患胃癌,為保命割走整個胃,好景不常,大手術後帶來浪接浪的後遺症,病後一直接受化療的她,今年2月荷蘭旅行途中因腰患急返港求醫,發現其中一段尿管出現纖維增生致閉塞,需要駁上人工尿管,每隔三個月便要入院更換膠管,日前她又兩度腸炎,絞痛不堪,今日還要往養和做磁力共振檢查,司馬燕堅持正能量抗病魔。
近日有報道指臉容憔悴的司馬燕,由老公吳忠義(Togi Gouw)陪逛超市,有指司馬燕體重僅得60磅,情況令人擔心,記者昨日致電給她慰問,她說:「我最低時60磅啫,𠵱家有71磅,不過呢排因為腸抽筋,食咗嘢就絞痛,有時仲痛到去腰部,痛起嚟又冇胃口,睇落咪覺得我好似又瘦咗。」司馬燕自胃癌割胃後,食量暴減,她說:「有時食兩啖飯就飽,始終冇咗個胃,食物直接落腸加重負荷,有時會好多氣頂住就唔舒服,冇胃口。」

「冇嘢打得低我」

司馬燕明知胃口不好,每日惟有少吃多餐,她說:「早午晚三餐係正常,中間肚餓就食吓生果、餅乾,盡量食多啲。呢排腸痛,我就食清淡肉碎粥,貪佢易入口易消化。」司馬燕日前已看腸胃專科醫生,並安排她今日入院做磁力共振,她說:「我嘅內臟大執過位,醫生懷疑我呢次係腸炎,要我入去照吓,總之唔係癌症,冇嘢值得怕。」
打過胃癌這場仗,司馬燕身體變虛弱頻病,她從不怨天尤人,並樂觀積極面對:「最勁嘅胃癌都打唔低我,冇嘢打得低我,日日起身對我嚟講,都係新嘅一天,我覺得由胃癌後每日都賺咗,即使係咁病,但所有嘢對我嚟講只係少問題,我盡量都唔去諗,諗嚟都冇意思,唔係病死係嚇死。有啲嘢煮到嚟咪食,交畀醫生為我解決,我𠵱家冇負擔。」司馬燕現輕鬆過每一日,她說:「病痛交畀醫生,醫藥費由老公畀,我就只係食多啲,瞓多啲,我好幸運有親人、家人同朋友愛錫。」

相關新聞:採訪手記:臀無肌肉 要坐軟墊

昨晚攜夫食晚飯

胃癌雖讓司馬燕身體受折騰,但卻沒打敗她的意志,她說:「當然生存多一年梗係多一年好,日日都有意外發生。不過上天注定我未走,即使20樓跳樓都唔會死住。我係有呢個病,但對比好多人天生殘疾,我已算好幸福,我有時睇新聞見到好多年輕人自殺,我好心痛。」司馬燕慶幸丈夫和一對兒子的關愛,令她求生意志更強,無時無刻都有着正能量。司馬燕今日再入院,昨晚7時多她和老公Togi約同中年男子到太古城中心開餐,愛妻號的Togi與老婆十指緊扣,淡妝司馬燕精神不錯。
採訪:比華利
攝影:陳辰、吳耀輝

【壹錘定音】星期一至五,早上8點開咪!
http://hammerout.hk

立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載