蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月03日
馬上成為壹會員

【add】紅人主場:官恩娜 女神夠辣

生於大溪地的官恩娜,一張十年如一日的baby fat臉龐,甜姐兒形象深入民心,面對不斷湧現的女神、BB,Ella仍留在網民女神的三甲之位,未被一眾90後殺退。對於網民厚愛,Ella照單全收,但原來她從不覺自己好hot。今年34歲的她談起整容話題毫不忸怩,講到婚姻大事更立場鮮明,女神個性看來更似甜中帶辣。

統籌:林妙萍
撰文及造型:趙潔恆
攝影:周樂恒
髮型:Eve Chiu of Queen's Private i

對於外間冠以女神之名,Ella展示其招牌陽光露齒笑容:「都好開心嘅,好過唔鍾意你或者憎你嘅。」意想不到這位天生擁有南太平洋熱情氣息的女神,原來從來不覺自己稱得上性感:「我從來都唔覺得自己性感或者好有吸引力,可能自己唔算好多興趣搞作,有啲悶,一啲都唔hot。我鍾意一啲好女性化的打扮,但從來唔覺得自己係hot chick(辣妹)。」那女神心目中的hot chick又是何等模樣?「我覺得𠵱家嘅90後後生女,好夠膽express(表達)自己,無論打扮、思想佢哋都好expressive(勇於表達)。其實我都好expressive,但係佢哋好似冇後顧之憂咁去表現自己嘅身體、衣着、語言,呢啲先係我心目中嘅hot chick囉。」

影相死穴

由模特兒做起到正式入行做歌手當演員,在鏡頭前神態自若的官恩娜,原來對自己的美貌也有挑剔時。拍攝時偶有點中其死穴的時候,一拍左邊臉就會觸及Ella的貪靚神經:「真係有好多死穴喎!不過慢慢成長,自己會放開啲,畀自己去試吓唔同形象,我有時會鍾意自己右邊臉多啲,近排覺得影吓左邊臉都無乜所謂。左邊臉睇起來圓啲,但係感覺會young啲。」

化妝微調

時下整容風氣盛行,官恩娜的樣貌更是不少港女最想變成的「整容指標」。對於這個女星最敏感的話題,出道以來一直為自己化妝的Ella揚言自己只是化妝改變樣貌,「點解會鬧出整容疑雲呢?其實十幾年前做model,仲未流行用假眼睫毛,咁對眼已經會冇乜神,我對眼仲需要畫眼線嚟收番窄眼距,但係傳統化妝係將眼影放喺眼尾,將眼睛擴大,咁樣反而將我雙眼長得太開嘅問題擴大到極點;所以雙眼睇起嚟有分別,係因為我嘅化妝方法改變咗,同埋人成熟咗,十幾歲嗰時會多啲baby fat。」
Ella拍攝當日也是自行化妝,不假手於人,寓工作於鑽研化妝技巧,表示整容非必要,因為可以於化妝方面下工夫。「我真係好好彩,我塊面唔算闊,又有下巴 ,鼻唔算高但係我都幾鍾意。咁都比上不足,比下有餘啦。如果要打針墊高個鼻,就會好肉酸;咁我個下巴已經好長,我化妝都要打好重嘅陰影,有時我又幾鍾意有啲包包面,感覺young啲精神啲,塊面太尖睇起嚟好似好刻薄咁。人哋通常想打針微調嘅位,我都覺得冇問題,所以都冇諗過打針。」對於外間對她的靚樣有誤解,Ella笑住擋煞:「之前喺instagram有人留言:『你個下巴整得好靚。』我就話:『係呀!係我阿媽整嘅。』」性格樂天的她四両撥千斤,百毒不侵。

結婚老套

美貌keep得好,但畢竟女人到30幾歲,被認定是成家立室的年紀了,與外籍醫生男友拍拖4年的Ella卻不慌不忙,「同男朋友都係認真交往,但都冇plan到結婚生仔咁長遠。」自Ella幾年前於《超級巨聲》中一展唱功,歌唱實力備受肯定,令她撇甩「緋聞女」形象,自此默默耕耘做音樂。近日她推出新歌《眼淚極黑》,坐港鐵自拍宣傳,又廣邀不同音樂人拍攝自彈自唱短片,上載於youtube;同時更盛傳她面試《中國好聲音》,雖然被飛出局,但種種迹象都顯示Ella於音樂路上仍不斷嘗試,她表示有得唱會一直唱下去,結婚明顯還未在其to-do list上。「其實𠵱家好多行內人都40幾歲先結婚生BB,我唔應該係人哋話畀我聽過咗30歲就要結婚生仔,咁樣好老套。其實係驚啲乜?係驚嫁唔出定驚生唔到仔,就一定要30歲就做大家以為要做嘅嘢?科技醫學都好進步,好多孕婦都30幾40歲,既然係咁,我哋有多啲時間做自己想做嘅事,遲啲生都冇問題。如果驚嫁唔到而去嫁就更可悲,明明你係冇一個合適嘅對象,因為人人都覺得你要嫁喇就去嫁,呢種想法好outdated。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載