› 選擇地區
三藩市
紐約
洛杉磯
其他美國地區
香港 台灣 北美
 
2014年07月17日

【add】紅人主場:
周秀娜 貪心才會贏

曾經「周秀娜」是一個現象,科大開talk討論,只得24歲的當事人還配合到場兼被問到口啞。五年過後,Chrissie成功證明自己不是曇花一現的𡃁模,密密接戲管它是閒角或花瓶,今年更有老闆蕭定一賞識,以2千萬元賣身連拍12部電影。轉型成功的Chrissie表示全因一個貪字,「觀眾好聰明同貪心㗎,大家覺得周秀娜除咗性感,仲有乜呢?好多謝觀眾逼我畀多啲嘢大家睇,鍾唔鍾意都係一種推動力。」
統籌:林妙萍
撰文及造型:鄧卓嶽
攝影:郭賢興
髮型:Daniel Cheng of Chin.G
化妝:Yan Chiu of ND&Co.Co

書展又再開鑼,不禁想起當年Chrissie引發的𡃁模寫真戰,身為元祖𡃁模的她,派雪糕、賣人形攬枕,奇招百出,邊被鬧邊上位。性感女神近年轉戰電影圈,被粉絲投訴錫身,忽然保守,她卻不以為然,「我冇刻意唔再性感,其實我平時着衫都好保守。大家諗起性感就諗到我,我係好開心被大家讚,社會不停變,自己唔改變又好難長久。」用心良苦,原來Chrissie只是怕大眾審美疲勞。

口硬心軟

港女星出現斷層,內地女星狂搶飯碗,然而此時Chrissie卻電影產量驚人,單是2013年便拍了十部,實在難得,姑勿論好片爛片,參與密度已足證Chrissie人氣。再看今年合作對手,與郭品超、鄭伊健、張智霖等型男拍愛情片,也許率真的個性正是吸引觀眾愛看她在戲中談情吧。「我諗導演監製知道我單身,想叫我拍拖啩!」

新片《分手100次》由鄭丹瑞執導,與伊健湊成一對,男弱女強的關係Chrissie頗有共鳴,「未拍之前我同旦哥講女主角同我唔似,不過演落發現我都係好強勢嘅女友,我唔係永遠啱,但係一定要贏。如果我好喜歡一個男仔,我會好似媽媽咁照顧佢,為佢安排好將來,因為女仔都係好需要安全感。除咗有啲倔之外,又唔識溫柔、唔識嗲男朋友,但係其實我都係口硬心軟,我會死撐死頂,口頭上咁講,實際上我又會幫佢、照顧佢,但係冇諗過喺其他人眼中係咁強勢同惡。」
戲中Chrissie經常鬧分手試探男友底線,現實中她曾經也是如此,「次次講分手唔係真係想分手,只係為咗一份存在感,一時之氣提出,但係心入面永遠覺得佢唔會走。你知道佢會認錯先,所以就好有把握講出口,聽落女仔都好似幾衰。」不過到了真正出問題,Chrissie反而會說不出「分手」兩字,「大家都好似等對方開口,自己多數會拖拖拉拉,然後到一個位毫冇辦法,我先會提出。男仔通常都等女仔講先,可能想畀女仔有下台階。」

熟男有望

29歲女神還是孤身一人,莫非擇偶門檻高令人卻步?「呢個階段想搵一個同自己差唔多嘅,大家諗法一致,溝通得到嘅。」最近跟多名成熟型男對戲,可有幻想找個熟男發展一下嗎?「年紀反而冇乜問題,傾到偈就得,相處過先知道。女仔最想搵到一個佢對住你嘅時候,好似小朋友咁成日嗲你,但係出去做嘢就表現得好專注,好吸引,感覺好有承擔。如果佢當我係媽咪咁嗲我會好開心,可以互相依賴大家,照顧佢嘅同時,佢又會教到我好多,我需要呢種互補嘅關係。」

事業線的事業

Chrissie對自己的身材一直努力保養,拍戲忙碌都要一星期打三日kickboxing,練出四嚿腹肌及老鼠仔,如此辛苦經營體態,事關年初為自家內衣品牌La Miu傾力演出,往日本拍攝宣傳照兼做生招牌,以超強事業線拚出另一門事業。數年前以7位數字投資創業,𠵱家分店開完一間又一間,誰說生意頭腦與好身材不能兩者兼得?

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載