› 選擇地區
三藩市
紐約
洛杉磯
其他美國地區
香港 台灣 北美
 
2014年07月17日

馮仁昭四圍超:夏蕙BB閃爆入棺 - 馮仁昭

向來都百無禁忌嘅黃夏蕙,噚日喺將軍澳一間社區中心搞咗個生前喪禮,喺儀式上,掛咗一張個樣好後生嘅夏蕙BB車頭相,跟住見到夏蕙BB戴住后冠,着住套黑色鑲滿晶石嘅長衫,坐喺個價值120萬嘅棺材,由負責扶靈嘅學者沈旭暉、喺深水埗派飯嘅明哥、保釣號嘅船長羅就等人推出嚟,成個儀式加埋用咗180萬!夏蕙BB話所有嘢會拎出嚟拍賣,善款將會捐畀榕光社,最後夏蕙BB畀大家瞻仰芳容,坐喺度同大家逐一握手!

捐晒所有嘢

講到遺願,夏蕙BB話:「我會將身體捐出嚟畀醫院,物質上所有嘢會捐畀慈善機構,我啲仔女都大個,佢哋冇諗過要我嘅一分一毫,最緊要係我嘅摯愛潘生,希望佢愛惜生命,唔好再鬥車!」佢仲話:「我奉勸大家唔好自殺,大家應該珍惜自己生命,世界實在太可愛。」夏蕙BB話今次嚟喪禮嗰啲全部係Fans,屋企人個個都知,但係佢哋好低調,所以唔想佢哋嚟。不過話晒人都未死,搞呢啲嘢好似唔老利,點知夏蕙話:「呢啲我唔驚喎!」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載