蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月25日

亞視拍檔感可惜
鍾慧寧患情緒病墮樓亡

亞視前藝員鍾慧寧上周四(17日)在青衣長安邨墮樓,倒卧在大廈對開空地,當場證實死亡,終年43歲。現場撿獲遺書,但鍾並非在長安邨居住,而是住在青衣海欣花園,有指鍾有情緒病紀錄。鍾慧寧參加1993年亞洲小姐而入行,憑着一張開心笑面,在《今日睇真D》擔任主持,亦曾跟鄭則士演出《肥貓正傳II》。據知鍾慧寧的喪禮將於下月6日在紅磡萬國殯儀館舉行。

相關新聞:口齒伶俐:主持《睇真D》受歡迎

被裁走後患情緒病

鍾慧寧因為身材高大圓潤,花名叫肥豹,據知她02年被亞視裁走,再無機會在幕前出現,之後她開始患有情緒病,十多年來因病受困擾的肥豹,由當年在《今日睇真D》認識的老公馮永泉照顧,可惜近年病情反覆,致今日的慘劇。
跟肥豹相識20載的袁潔儀,在事發當晚收到肥豹丈夫的電話,得悉噩耗,潔儀姐姐表示肥豹老公很傷心,但仍然很堅強,談到肥豹的情緒病,她說:「佢離開咗亞視之後,就一直有情緒病,之前仲以為佢好咗好多,佢先生成日陪住佢,樣樣都照顧佢,不過最近佢屋企有啲事,可能咁樣激起佢嘅情緒,我哋不時有見面,完全察覺唔到,見面仲嘻嘻哈哈,聽佢口氣仲想出返嚟做嘢,仲諗住佢會積極減肥,整理吓自己。」警方曾撿獲遺書,袁潔儀欲言又止:「都唔知應唔應該講,都係嗰啲啦,多謝先生咁多年來嘅照顧。」據知遺書除了感謝丈夫外,亦透露她多年來受情緒病困擾。

蔡國威:唔想接受

袁潔儀難忘當日跟肥豹在亞視同日被炒一事,她說:「咪係同一時間喺亞視俾人炒。(當時攬住喊?)冇,大家互相支持。」袁潔儀感到惋惜,卻又希望肥豹一路好走,她說:「呢條路佢自己揀,都冇辦法,個病都困擾咗佢咁多年。」
入行開始認識肥豹的蔡國威,最初不肯相信肥豹自殺的事實,他說:「我收到消息又唔敢打畀佢屋企人,我都唔想接受,近年以為佢好番,有聚會見到佢好開心,以為佢好咗冇嘢。」寶珮如亦聽聞肥豹自殺的消息,她說:「我自己都試過輕生,自己好大困擾人哋唔知,佢有情緒病都係一種困擾,當然覺得好可惜。」
採訪:楊潔雯

【專家話】情緒病有先兆

藝人鍾慧寧早前疑因情緒病而輕生,過往亦有不少藝人飽受情緒病困擾。臨床身心及行為學家李寶能表示,情緒病是指突然情緒失控、缺乏自我管理情緒能力的人,他昨日受訪說:「情緒失控唔等如精神病,情緒失控嘅人平時係正常嘅,只係有誘因如被炒、喪親等,令佢哋突然控制唔到自己情緒,好多人以為食藥就可以控制病情,但其實好多研究報告都指出藥物只會抑壓情緒,甚至令你情緒再低落,如果有誘因,更會令患者情緒崩潰。」李寶能指最有效的治療,是好好學習管理自己的情緒,及尋求專業人士的協助。李寶能表示假若發現親友生活習慣突然轉變,比平常變得寡言、眼神呆滯、沒有食慾等,就要多加留意及關心,因為這均是患上情緒病的徵兆。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載