蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月25日
馬上成為壹會員

開記招喊爆
馬賽承認仲有艷照

【人前灑淚】
馬賽接受訪問時淚如泉湧,表現得楚楚可憐。

【情趣馬賽克之引之為鑑】馬賽着情趣內衣跳艷舞的無打格圖片,前日在網上瘋傳,慘被睇晒三點的她即時報警,案件交灣仔重案組跟進。昨日馬賽着白色恤衫返無綫照肺,她受訪時情緒崩潰爆喊,更驚爆應該仲有未曝光的艷照,哭訴由去年至今每日都很難捱:「我覺得擔心都係冇用,我唔可以被打倒,幾難跨都要跨過呢個關口。」

相關新聞:汪子琦發聲明中馬瘟

現年26歲的馬賽去年介入汪子琦與內地富婆Laura的戀情,橫刀奪走TB汪子琦,可惜斷背戀見光死!前日馬賽被爆着情趣內衣跳艷舞的短片,無打格圖片更火速在網上瘋傳,馬賽對鏡頭自摸、趷籮、扭腰風情無限,哄動全城。馬賽即晚發聲明,強調自己沒擁有影片和截圖,矛頭直指遭舊愛出賣:「我很肯定愛錯人!」並已報警處理。

否認自拍艷舞片

艷舞片曝光,馬賽即被無綫暫停所有工作,昨日返無綫被樂易玲照肺,下午約4時,馬賽一身白色「純純兔」look現身,化淡妝仍難掩雙眼微腫,明顯哭過。馬賽見完樂小姐後,由宣傳科副總監曾醒明拖手見傳媒,問見完樂小姐有甚麼結果?馬賽甫開腔即哽咽:「我係一個成年人,要為自己做嘅嘢負責任,公司暫停我所有工作安排,我係好接受,確實需要靜吓休息吓。」
馬賽透露艷舞片是去年拍攝的,但否認自拍,問拍片者是否舊愛?她說:「佢當然係我曾經非常之親密嘅一個人,曾經好盲目信任一個人,希望呢件事令所有女仔識保護自己,其實有好多可以引以為鑑嘅例子,但永遠當你好投入一段感情好愛一個人,覺得呢啲事情永遠唔會發生自己身上,覺得佢會保護你,但我𠵱家知道只有自己可以保護自己。」

相關新聞:無綫大細超?Coffee:馬賽好可憐

患抑鬱恐懼人群

問有否其他未曝光的影片和相?馬賽初時支吾說:「其實我真係唔知,但無論再有乜情況,自己一定堅強面對。」再追問有冇影過?她才驚爆:「應該仲有,我知乜嘢人有,自己係冇呢啲。」未曝光的片最激是甚麼?擔唔擔心再流出?她說:「我唔知人哋拍過乜,其實舊年年尾到𠵱家,每日都過得唔容易,中間患過抑鬱症,有睇精神科醫生有食藥,有人群恐懼症,我覺得擔心都係冇用,冇嘢需要去驚,我唔可以被打倒,幾難跨都要跨過呢個關口。」點解會患抑鬱?馬賽說:「你同一個好親密嘅人有親密行為,你相信佢一定會保護你,唔會由嗰時開始擔心,而係嗰段時間好多報道令我分唔清楚,自己係咪理解能力有問題或有病,好驚見到人又食唔落飯。」對於艷舞片中目光好迷,馬賽強調沒食藥只微醉。

為家人堅強面對

馬賽指與汪子琦及Laura自去年年尾已沒聯絡,對於她們否認放片?有否講大話?馬賽只說:「我知道條片係邊個拍,亦知道邊個有呢條片,點樣放出嚟或者乜嘢途徑放出嚟,呢樣留畀警方查證。」汪子琦指曾收到好多馬賽類似的短片,她說:「佢講嘅嘢我唔回應。」發片者想摧毀你事業?馬賽即爆喊說:「人哋想做乜我唔知,作為爹哋媽咪嘅女,我都要好堅強企出嚟畀屋企人交代,佢哋更加難受。爸爸話:『女,唔使驚,天塌下嚟都幫你撐住!』」

有否考慮退出娛樂圈?她說:「冇諗過以後仲可唔可以做呢份我喜愛職業,但作為一個女仔,我要為自己講幾句說話,同埋要保護番自己。」事件會否影響性取向?她說:「喺愛情入面冇分男女,我曾經為愛情不顧一切。」後悔拍這些片?她說:「呢個世界冇得後悔,做過嘅要承擔,我好肯定我愛錯咗人。」馬賽現藉宗教平靜心靈,信佛的她前日不斷聽佛經和佛音。馬賽還接受《東張西望》訪問,眼紅紅說:「愛一個人時盡量滿足佢要求,自己唔想睇到片好尷尬,重案組話已經減少好多相同片。」而據警察公共關係科表示,一名27歲男子本月23日到灣仔警署報案,指一名26歲女子發現其照片及影片被發佈在互聯網上,警方暫列為不誠實使用電腦案處理,交由灣仔警署重案組跟進。據知昨日警方到馬賽屋企落口供,馬賽指影片是在上海拍,一名汪小姐在場揸機拍攝。
採訪、攝影:梁繼光

【法律意見】不能用版權條例阻散播

馬賽艷舞片流出後,網民紛紛求片。馬賽前晚發聲明表示已報警處理,究竟能否阻止網民繼續散播影片?本報昨致電梁永鏗律師了解,他認為這次跟08年陳冠希的淫照風暴類似,他說:「陳冠希當年用《版權條例》,因為段片係佢自己製作。但呢次係咪馬賽製作就唔知,未必可以用《版權條例》。但都可以用《私隱條例》要求別人停止散播。」他表示按最新修定的《私隱條例》,違法者可能負上刑責,但傳媒則可獲豁免,因為要從新聞自由和市民知情權中權衡。
至於當年淫照風暴,朋友間互常傳閱仍是合法,故警方未能捉拿「奇拿」。但在馬賽事件上,梁律師認為朋友傳閱都可能觸犯《私隱條例》:「因為一張都叫做發放,都有機會觸犯,但程度會唔會涉及刑事,就要視乎法官點睇。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載