› 選擇地區
三藩市
紐約
洛杉磯
其他美國地區
香港 台灣 北美
 
2014年08月02日

我主場:大文豪有火

周柏豪終於等到可以踏紅館開騷,不過卻惹來網友嘲諷他票價憑甚麼賣$680。
攝影:仇志德
場地:Misto restaurant
化妝:Kris Wong
髮型:James fan@Hair Corner K11

第一次上紅館開騷,被嘲是二打六扮巨星,門票貴過王菀之。

第一次買dream car,被譏扮潮人揸潮車,向余文樂挑機。

入行7年的「大文豪」周柏豪好惹火,上紅館、買dream car都成為熱話,現年29歲的他自認未成熟,仍然會發脾氣,惟難得年少氣盛的他,對於是是非非卻看得好開,能夠㩒住脾氣說:「我係唔會生事嘅人,世界已經好複雜好多噪音!」

撰文:余燕儀

等了7年,周柏豪將於9月踏紅館開騷,處男騷門票$680,有網友卻嘲諷:「王菀之夠係唱作歌手啦,最貴飛都係$550,我真係唔知大文豪憑乜嘢開價$680囉!」雖然被人睇唔起,但兩場門票卻沽清,柏豪說:「票價唔係我定,我唔識,當然老闆有信心先投資,佢有信心時我又有信心,買飛嘅人話番畀網友知,究竟我值唔值,呢個係我一個夢想目標,唔會理負面聲音。」

個唱爆滿爭口氣

門票首賣好快沽清,加場又再爆,是否覺得爭番一口氣?柏豪坦言:「當然有咁嘅感覺,但我從來唔係會生事嘅人,網絡世界好複雜好多噪音,我想靜靜地專心做好呢個騷,自己都算現今娛樂圈非常活躍歌手,一年派五、六隻歌,大家就算唔留意,都會唔小心聽到,我覺得係好事,上年開始好多牌子客戶搵我合作,今年再多啲。」
捱了7年,柏豪現有樓有車還做老闆有自家品牌,是否覺得做藝人唔長遠,所以搞時裝生意?他說:「都唔係,係一個興趣,爸爸未退休前做生意,由細到大聽佢講好多生意嘢,𠵱家牌子做得好好,多咗啲零用錢囉,但都忙㗎,好多嘢要兼顧。」問任職時裝買手的女友Stephanie有否幫手?柏豪避忌說:「呢位朋友有自己職業,大家會傾吓,好多朋友畀意見。」

愛撒嬌未想結婚

低調感情怕影響事業?他說:「我向來都低調,唔關事業,我想專心做嘢。𠵱家感情好開心,但結婚唔會短期事,自己都未搞掂,個人未成熟,我覺得自己仲係細路,仲會發脾氣,如果要結婚想有小朋友,我咁細路仔易發脾氣,照顧唔到身邊人,𠵱家仲係依賴爹哋媽咪,唔開心會嗲吓佢哋,如果我做老公老竇,唔嗲得阿爸阿媽,咁會好核突,我好大責任心,好享受人哋乜都問我,如果老婆有嘢問我,我要問阿哥點解決,我會覺得好𤓓!」

向余文樂學習

入行7年,柏豪早已明白娛樂圈的方程式:「永遠有嘢成功咗,好似演唱會、買車,一定係話我挑戰邊個攞嚟比較,算啦,呢行係咁,我會接受。」好像柏豪最近斥逾百萬買Benz Jeep,又被譏扮潮人揸潮車向余文樂挑機,柏豪說:「佢係好嘢我梗係學佢,我對好多嘢唔專心,有時我好佩服佢,佢對好多嘢好投入,如打波、做牌子,個個男人都想買夢想嘅嘢,唔等於我模仿佢,事實上我有學佢,大家朋友互相影響學習,我梗係學好嘢,余文樂係好嘢。潮人?我從來冇覺得自己潮,自己都鍾意懷舊嘅,我係老土底鍾意舊設計嘅車。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載