› 選擇地區
三藩市
紐約
洛杉磯
其他美國地區
香港 台灣 北美
 
2014年08月07日

控訴遭性騷擾有長版
麥貝夷爆司機貼面找錢

林建名旗下大名娛樂去年解約的歌手麥貝夷,日前在facebook控訴搭八折的士遭司機性騷擾:「司機係咁話一聽我把聲就知我靚女……唔該,可唔可以收斂少少,唔好話畀我知你係隻狗公,長時間用緊下體諗嘢呢?成日俾人性騷擾,我覺得好難頂!」網友譏笑她曲線讚自己靚,又普遍認為她小題大做:「照佢咁講,啲靚女女明星咪一日俾人性騷擾幾百次?」事後麥貝夷刪走貼文。

稱司機幾次回電

昨日麥貝夷接受電話訪問,親述被性騷擾的經過:「嗰日朝早11點call的士,司機覆我約地點,佢好似唔清楚位置,因為自己住村屋,入嚟幾複雜,約佢喺大家理解嘅地方見,佢無厘頭打幾次電話畀我,又話:『你把聲好好聽,好想見吓你。』上車後佢又話:『你好靚女,聽你把聲就知你靚女,你係咪明星?』當時自己冇化妝,覺得佢奇怪,惟有微笑,特登戴耳機聽歌唔聽佢講乜。」
之後到達目的地,麥貝夷付車資時又有事發生,她說:「司機叔叔找錢,我搵手接散銀,當時好驚,唔敢同佢接觸,佢好似蜘蛛俠咁挨埋嚟,佢塊面對住我塊面,相隔只有四隻手指位:『你真係好靚女。』仲好慢咁找錢畀我,掂到我手掌,雖然唔係乜位置,但我覺得好難受。我好驚,車裏面得我哋兩個,當時唔識報警,即落的士走,但好唔開心好嬲,打畀助手哭訴好不忿,喺fb宣洩。」

經理人干涉刪文

麥貝夷指司機年約40多歲,有很多鬍鬚,她擔心說:「佢知我住邊,又有我電話,朋友叫我小心,如果佢打畀我,我一定報警。」對於遭網友恥笑,她說:「其實我同文恩澄講過呢件事,覺得好委屈,佢話我冇仔細描述點騷擾我,呢個評語(靚女)唔係我講,各花入各眼,唔知佢係咪重口味,喺我角度係性騷擾。」問點解刪除貼文?她解釋:「經理人話用詞唔恰當,唔想經理人唔開心。」
採訪:皓騫

【狗公一詞可被反索償】

【律師意見】就麥貝夷在facebook的留言,究竟的士司機的言行是否構成性騷擾,記者昨日致電大律師陸偉雄了解,他認為要視乎實際情況:「要視乎司機當日嘅面容、動作會唔會好猥瑣,但單憑一句『靚女』唔足以構成性騷擾。」陸續稱又要視乎女方當日的精神狀況,譬如是否喝了酒或極度疲倦:「因為咁樣對事物理解能力亦可能減低,誤會機會亦大咗。」
不過,麥貝夷暗示對方是「狗公」、「長時間用下體諗嘢」,這又是否構成誹謗?陸偉雄稱「狗公」一詞已是指控,該的士司機甚至有權向她反索償。陸認為麥貝夷若想尋求法律協助,應事先向律師徵求意見,了解勝算後才作出行動,以免「偷雞唔到蝕渣米」被反索償。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載