蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年08月07日

盛女Mandy變柔情妻
降服躁底Guy

聞沒女,思盛女。
盛女Mandy去年被爆搭上求愛男阿Guy,一年的愛情故事火速開花結果,兩人上周宣佈訂婚,明年拉埋天窗。一對準新人大前日拍拖接受訪問,全程如連體嬰,甜蜜背後原來非常火爆,性格躁底的阿Guy拍拖時未有憐香惜玉,365日內嗌過20次分手,幸好屢獲Mandy包容,沒有狼來了,卻造就了幸福的開始。
撰文:比華利

盛女Mandy crossover求愛男阿Guy,兩個情路dry爆的飢男餓女,一年前因為大台的真人騷宣傳,緣份安排兩人遇上,一拍即合,他們拍拖一年,近日慶祝周年紀念時,阿Guy乘勢求婚,上周一他們在facebook公佈婚訊,全城祝賀。

相關新聞:急影婚紗相

分手當食菜

阿Guy大前日拖實Mandy到尖沙嘴接受訪問,全程十指緊扣,婚訊被廣泛報道,阿Guy得戚說:「我好似登陸月球插旗咁開心。」
Mandy有外貌有事業,名花未肯為一棵樹放棄整個森林,參加真人騷《盛女愛作戰》更被揶揄為拜金港女,機緣巧合下認識了另一真人騷《求愛大作戰》的阿Guy,兩人邂逅時並沒過電,Mandy直言看不上怕醜仔阿Guy,後來盛女和求愛男活動多了,Mandy慢慢開始欣賞博士身份的阿Guy學識廣博,阿Guy也被Mandy的鬼馬話題電暈,距離越拉越近。到真人騷播完,眾人各自歸位,阿Guy對Mandy心掛掛,他才意會中了愛情降,發力一追Mandy便成功。
別以為兩人的愛情故事甜到漏,Mandy說:「我哋啱啱開始冇耐,阿Guy就要飛英國做研究,我哋只靠facetime談情,小別冇勝新婚,反而問題好多。我哋一有拗撬,阿Guy就話要分手,拍拖一年,大大話話嗌過分手都20次,我都同佢講你因住上得山多終遇虎。」

女負責撲火

阿Guy知衰及自認躁底:「我哋嗌親交幾血腥又暴力,三、四個月前我哋先吵鑊勁,我又話要同佢分手,我激氣起嚟就一發不可收拾,呢個係我性格上嘅缺失,或者因為成日異地一個人寫論文,個人dry爆好暴躁,我又唔識控制情緒,呢次我哋冷戰咗好耐。」每次幾乎都是Mandy主動撲火,這次都不例外,經過一年磨合,兩人相處漸有默契,拍拖一周年,阿Guy認為是適當時候把Mandy私有化。

躁爆的阿Guy遇上溫柔Mandy,正好產生中和作用,阿Guy在訪問中忽然情深款款說:「基本上我哋係大纜扯唔埋嘅兩個人,Mandy真係上天派佢嚟。老婆,我想趁呢個機會同你講句sorry,多謝你一直不離不棄照顧我呢個精神病人。」Mandy聽後十分受落:「呢啲真係緣份,啱時間畀我遇上啱嘅人,我覺得真係要珍惜。」

攝影:沈健程
場地:Sabatini(帝苑酒店)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載