› 選擇地區
三藩市
紐約
洛杉磯
其他美國地區
香港 台灣 北美
 
2014年08月09日

七月十四
三鬼王拍門

今日七月又十四盂蘭鬼節,無事出街少撞鬼。鬼,可以是驚心動魄聳人聽聞,魑魅魍魎又可以變成生財工具,從海洋公園每年的鬼佬鬼節,搞得有聲有色就知。回看當年一代鬼王雷宇揚借靈異先後在廣播、電影及網上打響名堂,掘出人生第一桶大金。俱往矣,鬼王退位在廣州娶了靚女主播、搞飲食業,每日以湊仔為樂。

舊鬼王去新鬼王出,先有潘紹聰以月費計劃聽鬼故《恐怖在線》賺個滿缽,再拍成同名電影贏到盡;挑戰者有「洗米華」梁思浩,別開生面裝app聽鬼故,同樣殺出血路靠靈異搵食。

採訪:何永寧

相關新聞:百足鬼王梁思浩三個證明你撞鬼

退役鬼王雷宇揚 進軍內地飲食界

多得當年王維基在科網時代的靈異節目,造就雷宇揚成為鬼王,不過一代鬼王現已退役。
現年50歲的雷宇揚日前在廣州旗下的餐廳接受訪問,他笑言現在講靈異故事出名的DJ路芙也是由他帶出身:「嗰時問唱片公司朋友有乜人介紹報交通天氣,因為要個盡責嘅,嗰位朋友話『呢個啦,8號風球都返工』,咪請咗佢講到𠵱家。」至於風水師李丞責亦是拍了雷宇揚的電影《行運秘笈》後成名,靠靈異起家卻不信有鬼,他說:「我唔信有鬼、唔信有風水、唔信有大師。我𠵱家唔想再拍鬼片,拍得太多。」

留內地落地生根

一早靠鬼起家,自言搵了「很大桶金」,今日已經跟「鬼」絕緣,從事風馬牛不相及的飲食業,在廣州先後開了兩間餐廳之外,更重要是娶了內地主播馬荔,去年囝囝雷庭出世令他更加沒有時間拍電影,更莫講鬼片:「我已經講鬼故講到厭,推咗好多。之前都係機緣巧合拍咗彭浩翔套《低俗喜劇》,𠵱家得閒都係接吓啲樓盤司儀做,平均一年有三分之一時間去咗內地做司儀,足迹遍及上海、福建、新疆一帶都有。」
講到從事飲食業生意是因為自己為食,他說:「第一因為鍾意食又唔想做pub & bar成日飲,其次喺成班朋友有地方可以聚腳傾偈,而最重要梗係可以成日見到個細路啦。𠵱家同班朋友一齊都係講湊仔經,大家行埋都係講入學校讀書嘅嘢。」目前囝囝未夠一歲,正在上內地的早教班,即香港人的playgroup,他笑說:「本來唔想個仔咁早讀書,不過返咗早教班之後,真係爬都爬得快啲。不過我都係決定唔畀個仔返香港讀書,香港亂晒籠,成個政治都係咁。」

相關新聞:網上鬼王潘紹聰拍靈異慘劇電影

買樓勁賺數百萬

阿雷名為翎萳小廚的粵菜館位於廣州天河區,地段的熱鬧程度就如同香港的蘭桂坊,他說:「之前同班朋友喺越秀區開咗間港式茶餐廳,30、40蚊有交易,但估唔到生意咁好。大陸人好鍾意港式餐廳,咁咪開多間中價啲嘅粵菜館,仲喺試業階段。呢度位置好,寫字樓為主,人流多,最好就係呢度行返屋企唔使十分鐘,方便每日返去同個仔玩,囝囝仲未夠一歲。」原本已經在廣州置業的他,在太太懷孕期間再在附近買了一層較大面積的單位,未入伙市價已升到差不多1,000萬港幣,升值一半有多。
採訪:何永寧
攝影:沈健程

鬼王之路:人稱鬼才瓣瓣掂

50歲的雷宇揚如何踏上鬼王之路?88年在大台藝員訓練班畢業後,一直半紅不黑,不久便轉戰電影圈。在90年代雷宇揚一口氣拍了一系列以鬼為題材的電影《陰陽路》,單拍鬼片已有十多部,自此步入鬼王之路。雷宇揚亦是電台DJ、作家、節目主持人、編劇及網頁主持,在電台主持鬼節目時,也推出過不少鬼故事內容的書,被人稱為「鬼才」。
雷宇揚也主持過不少與靈界有關的節目,如電視節目《怪談》以及電台節目《靈幻搜奇》等。至於鬼王稱號的由來?雷宇揚解釋當年科網潮,為王維基的網上靈異節目擔任主持,登報宣傳時,以「鬼王」來稱呼他,自此鬼王不脛而走。另一說法是雷宇揚經常主演鬼片被影迷們稱為「鬼王」。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載