› 選擇地區
三藩市
紐約
洛杉磯
其他美國地區
香港 台灣 北美
 
2014年08月18日

捱足28年拍短片逐多倫多影展
梁健平下一站康城

在電視圈捱足28年的綠葉王梁健平,觀眾認得樣,但未必叫得出他的名字。梁健平現為港視藝員,卻因港視不獲發免費電視牌,令他前路茫茫。幸好給他趕上尾班車,主演短片《三輪車伕》擔正人生第一個男主角,角逐多倫多影展最佳短篇電影,下一站更準備參戰康城,進軍國際!縱使將來不能名成利就,梁健平亦早有打算:「我揸車洗碗都得,唔係做演員就身份尊貴。」

相關新聞:三輪車伕:為交租搶劫

現年54歲的梁健平,最近因為衝出香港,客串演出韓劇《命中注定我愛你》而備受注目,加上他處男下海擔正做男主角的18分鐘短片《三輪車伕》(Tricycle Thief),近日被指在多倫多國際電影節奪得最佳短篇電影,網民為他高興得熱烈彈琴熱烈地唱,連廖啟智也發短訊恭賀,一時間令梁健平人氣急升。

要成名發放正能量

不過,梁健平日前接受本報專訪先來個澄清:「一個美麗嘅誤會,其實我哋只係喺幾百條片入咗圍裏面嗰幾條,未攞獎,我好希望導演可以得到獎,佢好畀心機。聽聞部戲有機會變一部正式電影,導演Maxim Bessmertny話預咗我一份。」除入圍多倫多影展,梁健平聞得短片還會報名參加康城及其他國際影展,一於向世界出發。
能夠接演韓劇及《三輪車伕》,梁健平感激港視經理人一番努力,並形容:「我係絕對好彩。」雖然一下子由寂寂無聞變成有人講得出自己名字,梁健平坦言還未覺得自己吐氣揚眉,身為基督徒的他說:「我只係畀心機去做,每一次演出都當係最後一次演出,令自己更加投入同努力。唔理係主角好、配角好,就算路人甲我都好認真去做,呢個就係我工作態度。最緊要有工開。我想自己再出名啲,因為出名就可以幫呢個社會做多啲嘢,有感染力令到好多人聚埋一齊為社會做多啲好事,將更多愛同歡樂帶畀人。」

相關新聞:小八卦:兩套《三輪車伕》帶旺雙梁

無綫捱到五勞七傷

在無綫的日子,梁健平吃過不少苦頭,連踩幾十粒鐘不眠不休打風落雨照開工已是「基本動作」,又試過拍古裝劇被武器打傷額頭,又腫又瘀繼續開工連戲,惟有將頭套拉到落眼眉遮掩。
經常被派演路人甲的他,最深刻一次是文戲臨時變成動作戲,梁健平說:「本來係傾偈,導演忽然叫我凌空抽起背脊落地,話覺得咁樣好睇好多,我咪去拍囉。地下冇墊,我拍咗兩次,第一次因為cameraman個位唔準,導演冇交代畀佢聽個位係點,跟住我第二次落地,背脊唔知邊度『嘞』咗一聲,好痛,收工返屋企係咁捽藥酒。最後場戲係剪走咗,聽聞因為同我做戲個男演員啲戲麻麻,出嚟啲戲我搶過佢。」

儲錢供兩女讀大學

當日梁健平在無綫以每月近二萬蚊人工撐起頭家,前年王維基的香港電視網絡高薪挖角,梁健平決定離開博一博,他說:「港視人工比無綫高一倍以上,我兩個女大,一個14歲,下月中四;一個16歲,下月中五,我好需要一份穩定收入嚟供兩個女上大學,呢個係最大誘因。無綫一樣有好多演出機會,但港視真係畀到一個好好價錢,希望呢幾年儲到嚿錢,畀兩個女讀大學,我心願係咁啫。」
港視不獲發免費電視牌照,梁健平固然徬徨,但未至絕望,他說:「我同港視仲有半年先約滿,人冇絕望,我哋永遠都有希望,唔做藝員咪做第二份工,我揸車洗碗都得,唔係做演員身份就尊貴,掃地洗碗都係有尊嚴嘅職業。當年拍《隨時候命》我做直升機師,我就諗會唔做揸貨櫃車揸van仔,嗰年我除咗的士牌之外,考晒所有營業司機執照,重型貨車、巴士、小巴,第日公司真係委派我做咁嘅角色,我就隨時候命可以做到。冇嘢做我咪揸車囉,有乜所謂,唔通揸車過唔到日子咩?好多司機都係揸車養家,職業無分貴賤。」
港視近日找李心潔拍攝的網劇《風雲》,梁健平也有份演出,據悉他正是扮演特首梁振英,對此梁健平只說:「我只可以透露做全港最大嘅人。」
採訪:戴彩煥

【Profile】梁健平(54歲)

入行經過:
86年加入無綫拍《城市故事》,前年離巢,現為港視藝員。

擅長角色:
辦公室同事、高級職員、西裝友等。

出位作品:
《棟篤神探》飾演阿平,與雪妮合演情侶。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載