蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年08月30日

陳偉成揚言跪玻璃箍煲
Yumi決絕:有乜事會報警

周秀娜舊愛Avis(陳偉成)日前因在Instagram踢爆女友Yumi(尹蓁晞)有「小三」,更開名指一名韓國男模力追Yumi感不爽,結果齊齊發表分手宣言。事後聲稱做錯事的Avis,前晚趁女友從馬尼拉工作回港,單拖現身機場,更揚言跪玻璃箍煲,但Yumi拒絕接受,更表示若Avis再有行動,會報警處理。
自稱不甘淪為宣傳工具的Yumi,前晚步出機場禁區時,面燶燶地說:「我唔知會call咁多記者嚟,落咗機佢先同我講,所以冇心理準備!」堅稱決定分手的Yumi,被問到分手原因,她說:「唔想再俾佢利用任何嘢,好似今日咁樣,我做嘢已經好攰,突然間call咁多人過嚟,我唔明佢諗啲乜嘢,如果有心𠱁我,佢唔需要咁樣做。」

「我𠵱家自己住」

Yumi續說:「之前已經想分手,有好多原因,但係我唔想再講人壞話,性格唔夾,冇任何第三者關係。」
當Yumi聽到Avis打算跪玻璃箍煲時,她冷笑地說:「希望佢快啲返屋企,離開呢度,大家唔適合,唔想再回應,想注重我嘅事業。」至於會否與在場的Avis打招呼?她直言:「唔會,我call咗的士走,我𠵱家自己住!」全程企在暗角的Avis,只望着女友離去,最終未有上前,他說:「佢安全OK,唔想搞到咁大件事,唔係呢個時候。等大家冷靜吓!」對於女友反感放料,他說:「我唔知點解佢會咁樣諗,我發誓全部記者唔係我call,但係真係冇辦法。」

Yumi昨日在尖沙嘴出席活動時再被問分手一事:「好多朋友以為我哋耍花槍,我哋係真係分手,噚晚佢有send訊息畀我,我冇覆佢。」Yumi決絕地表示箍煲都不會接受,她說:「如果屋企有佢嘅嘢,會叫佢拎番走,唔想佢再騷擾自己同朋友,好想封鎖佢!」至於會否擔心Avis有下一步行動?Yumi竟然說:「唔擔心,有乜事會報警。」
採訪:王連連、溫敏芝
攝影:仇志德

【壹錘佔中】8月31日 5pm直播
壹錘定音: http://hammerout.hk
和平佔中: http://occupycentral.appledaily.com
YouTube: http://bit.ly/occupycentral

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載