› 選擇地區
三藩市
紐約
洛杉磯
其他美國地區
香港 台灣 北美
 
2014年09月04日

【add】紅人主場:謝安琪 時勢造女神

人在娛樂圈,即使有壞新聞都總好過無新聞,謝安琪近年惹起過的是與非,勿論好與醜,足令她多次登上茶餘飯後的熱話榜首。金曲唱紅過,緋聞鬧過,被冠以高登女神與B餐人妻之名,統統照單全收;在眼下紛亂不安的時勢,她被指憑歌抽水,啃下去,天涯何處無高牆?

統籌:林妙萍
撰文及造型:趙潔恆
攝影:郭賢興
化妝:Natalie Soo.Ki of ND & Co.
髮型:Eagco Leung

藝人多避談社會議題,事關一談就難免進退失據,尤其在大是大非的此時此刻。謝安琪早前於敏感的七一前夕在網上發佈了歌曲《雞蛋與羔羊》,熱血聽眾立時對號入座,源於電影《被奪走的12年》關於自由與奴隸的歌詞被無限發酵。「創作首歌時擺咗好多意念入去,接收嘅人喺呢隻歌入面會聯想到乜嘢,或者鼓勵咗佢哋去做啲乜嘢,促發佢哋關心啲乜,都係將呢首歌交畀大家之後發生嘅事,至於隻歌敏唔敏感呢,我覺得唔需要框死大家去諗,呢首歌能夠帶畀你係乜就係乜。」

多角度議事

誰知一句「大劫在頭上不堪設想」,謝安琪被指趁機抽水炒作;事實上一出道就以《姿色分子》講瘦身整容,之後的《囍帖街》講城市重建,《十二月二十》講貧富懸殊,她的歌路一直緊貼社會現象,更因此被封草根天后。「好想去表達嘅嘢,我都一定會去講,我覺得冇嘢唔可以創作歌曲。過去幾年香港經歷嘅大小事件,為香港人帶嚟好多反思同反應,大家嘅感受好多時都係負面嘅,又有好多對立聲音。喺咁嘅環境下創作嘅歌,反而令大家更沉重,並唔係我想做嘅事。我想帶出嚟嘅視野廣闊啲,對於你嚟講乜嘢係嗰道高牆呢?可以人人都唔同,希望可以喺呢隻碟建議多一個角度去觀察我哋嘅生活。」

十年幾番新

抽水危機實屬小菜一碟,入行將近十年,謝安琪見過的風浪也不算少。自謔個性倔強又不擅於交際的她,曾問上帝為甚麼要安排自己入了娛樂圈。「入行遇到嘅辛苦都同某一啲媒體報道嘅手法或者風氣有關嘅,藝人會首當其衝承受壓力。不過我冇太過執着,漸漸明白到其實好多人都面對緊呢種窘境,呢種風氣其實影響緊整個社會點睇我心愛嘅音樂演藝行業,並唔係只係我謝安琪開唔開心。我因為咁而變得更堅強,同埋眼光更闊。」
今年自組公司出碟,從十年前的懵懂女生,升格做老闆擔起營運重擔,計數與創作同步進行難不到她。「喺自己能力範圍內任性囉,又不至於不顧一切咁浪漫。除咗市場上我哋認為最流行嘅、最容易賣得出嘅、樂迷喜歡嘅K歌,穩打穩紮之外,我哋願意去做啲冒險啲嘅,唔同類型或風格。可喜係做咗十年都仲生存緊,雖然唔係首首歌都成功,都想繼續落去,想用自己小小嘅能力去豐富一下本地樂壇嘅類別。」

反思B餐論

食得鹹魚真要抵得渴,謝安琪三個字被大眾及媒體用來消費與娛樂,甚至在網絡潮文中被擬物成一個B餐擺上枱。「原來𠵱家會咁公開發表去討論人哋嘅婚姻,甚至去比較兩段婚姻,可能我老套啦;篇文令我了解多咗原來咁多人覺得另一半身家有幾多係咁重要。我係感受到作者對我嘅祝福,呢件事又冇令我好尷尬,反而令我思考咗好多。」
套餐論將婚姻同金錢掛鈎,與張繼聰結婚8年的謝安琪眼中的婚姻卻很單純。「結婚時冇問過我另外一半其實你有幾多身家,我哋結婚之後會過乜嘢生活都唔係我最着緊嘅事。我睇婚姻比較單純,我同佢相處好開心,靈魂溝通得到,就係咁簡單。」甚至她決定嫁給張繼聰,都只為笑一世。「佢求婚之後我就諗,其實呢個人真係好好笑,到八、九十歲都會咁好笑。有乜好得過有一個人成日喺身邊令你笑?我就覺得好抵呀,每日都有咁多好笑嘅事,佢真係有咁嘅本事。」

更多精采時尚內容,盡在 http://add.appledaily.com。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載