蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年09月21日
馬上成為壹會員

海參崴開工 爆成龍辭演
洪金寶:掉轉係我都傷心

洪金寶(中)昨日在俄羅斯海參崴街頭拍外景。

【俄羅斯直擊】洪金寶(三毛)最近在俄羅斯城巿海參崴為自導自演新片《老衞兵》拍攝外景,太太高麗虹、二子洪天祥和女友、細女洪煦榆昨日去了拍攝現場探班,高麗虹全程陪伴在側。洪天明日前亦有帶同囝囝洪大仁(TJ)探爺爺班,有孫萬事足的三毛笑說:「佢坐喺度嗌action,好有表演慾,叫爺爺就最出力。」高麗虹透露三毛早前捱病了患上感冒,不過甫見孫兒到來即一副蓮子蓉樣,高麗虹又爆料指天明和老婆周家蔚正努力再造人,三毛坦言渴望抱孫女。
三毛一家幸福滿瀉,反觀昔日七小福的師弟成龍,卻因為兒子房祖名在北京涉毒被刑拘而發愁,作為長輩的三毛坦言最初得悉事件感到十分震驚,他說:「掉轉係我都傷心,心情唔好,有邊個老竇會哈哈哈。祖名平時好乖巧,次次見親佢都遞支雪茄畀我食㗎!」

唔會訓斥祖名

三毛揚言不會助成龍訓斥祖名,他說:「使乜我訓示,發生呢件事,好多人喺佢面前講,我再講就多餘,都要畀細路仔空間,等佢心情平復去面對,毋須再去講同一樣嘅嘢,我關心都冇用。」三毛透露成龍本來答應助陣演出,不過在祖名出事前就以工作忙為由推辭了。問他有否致電成龍慰問?他說:「冇,我驚佢鬧我,打電話去又唔知講乜,佢又唔知點答你,等佢靜一輪先至同佢傾偈。」
此外,三毛表示新戲請來劉德華、麥嘉、石天、徐克,以及元秋、元華等七小福助陣演出,劉德華今天才會飛抵當地投入拍攝工作,他笑指今次碌盡人情卡:「徐克做幕後真係嘥咗佢,佢做幕前好得意。」他又謂當地政府相當支持電影拍攝,政府人員及警員均有到場封路協助拍攝。
採訪:張俊銘 
攝影:仇志德

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載