› 選擇地區
三藩市
紐約
洛杉磯
其他美國地區
香港 台灣 北美
 
2014年09月28日

有話兒:杜汶澤點醒開竅
DaDa釣仔攻略

杜汶澤日前接受專訪時大讚DaDa有喜劇天份,而DaDa也有意做觀眾的笑彈。攝影:沈健程

陳靜(DaDa)去年受抑鬱症困擾,衝動宣佈退出,經過調節心情,其後火速重返影圈,孖伯樂杜汶澤合作電影《唐伯虎衝上雲霄》放笑彈。DaDa近日覓得上海男友,為這段異地情,不介意密密做「飛女」,又風騷發表「釣仔論」,阿澤忍不住寸爆他們「互釣」維繫感情,阿澤同時贊成DaDa拍拖有慰藉,才不會亂鑽牛角尖。
撰文:比華利

相關新聞:爆炸糖原來好玩得

陳靜去年8月,突然在微博公告退出,她留言:「生活好累,人言可畏。壓力、痛苦,總是一起來。家庭、情緒、健康和感情問題,讓我下了這決定。」DaDa壓力爆煲閃退,伯樂杜汶澤好言相勸都冇效,但不足3個月,她又戲劇性宣佈復出,事隔一年多,DaDa告別喊包變開心果,除了事業重上軌道,最近還愛情得意,不時把上海新歡掛嘴邊,引得阿澤都八卦大逼供。

「仲未發生,了解緊」

趕走抑鬱,重展歡顏的DaDa,去年復出即與阿澤合作電影《唐伯虎衝上雲霄》,瞓身拍攝喜劇,片場內外更為DaDa增添正能量,她日前與阿澤在九龍灣接受本報專訪時,開竅的DaDa說:「呢啲經歷,令我學到嘢,我人生都算幸運,好多貴人,不得不承認,𠵱家係我人生最開心嘅時間同狀態。」阿澤不忘取笑她:「你咁識諗,特首都有得你做,不過邊個做都會好過𠵱家嗰個。」
DaDa心情大靚,隱形Mr.Right功勞不少,有愛情滋潤,脫離dry爆宅女行列,風騷的DaDa樂得頻頻飛往上海蜜會至愛,阿澤不禁揶揄:「你成日返上海,除咗食大閘蟹……梗係食好嘢。」看到DaDa嘴角含春,阿澤忍不住追問,DaDa誓保戀情:「我哋係幾好,但仲未發生,了解緊,大家有好感。其實我返上海,係順便探外婆。」阿澤說:「嘩,你咁醒目擺個外婆喺上海。」

相關新聞:一個大話嚇到唔敢NG

有慰藉就有動力

究竟何方神聖成功與宅男女神DaDa過電?阿澤好奇問:「有冇相贒吓?」DaDa即答:「私下畀你睇冇所謂。」阿澤抵死說:「我冇私下㗎喎,你畀相我,我就直接擺上facebook。」嚇得DaDa立即打退堂鼓:「我係想拍拖,但我哋未正式係,我想吊吓佢(癮)先。」阿澤寸嘴說:「你似乎想拋吓佢浪頭,唔好以為得佢一個,你吊吓佢,但又怕佢吊番你,你哋𠵱家擺明係互吊咁話。」給阿澤睇穿詭計,DaDa尷尬說:「我諗都係。」阿澤奉勸DaDa越洋談情始終異地相隔,甚難維繫。
DaDa對戀情仍有所保留,她擔心過於沉醉會影響工作,阿澤卻支持她兩者兼顧:「一睇就知DaDa鍾意拍拖多過做嘢,佢之前有情緒病,最大問題係冇拖拍,佢得閒就亂諗嘢,一個人喺屋企諗左諗右,諗唔通就話退出,搞到變成全地球退出後又最快復出嘅藝人。DaDa𠵱家收工有慰藉、有寄託,佢會覺得捱得抵,做嘢動力都多咗。」DaDa認同:「我之前怕自己拍拖會影響工作,𠵱家識諗咗,明白每個階段都有唔同,我自問幾注重家庭,𠵱家工作做好啲先,多啲人生經歷就建立一個好家庭。」

可組隊Milk Supply

阿澤和DaDa雖然相識日子不長,但兩人卻大有默契,他說:「我拍戲同過好多女星熟落咗,變咗老夫老妻,好似薛凱琪、江若琳同埋DaDa,好多人唔熟先有火花,大家唔識,拍完咪熟。」
阿澤形容擁有E奶的DaDa是「螢幕老婆」中身體最壯健,他說:「一睇就知佢好生養,一睇就知佢生咗幾個仔都唔會餓親,以前有樂隊叫Air Supply,而DaDa直情可開一隊叫Milk Supply,可以供應埋隔籬鄰居,餵到成村人。」

場地:星影匯
化妝:Kayte Fung(陳靜)、小鬼(杜汶澤)
髮型:Kayte Fung(陳靜)、Ritz Lam of Hair Corner(杜汶澤)
服裝:Moussy(陳靜)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載