› 選擇地區
三藩市
紐約
洛杉磯
其他美國地區
香港 台灣 北美
 
2014年10月04日

買麵包雪糕朱古力
官恩娜面癱男友貼心餵食

【大角嘴】官恩娜(Ella)同混血醫生男友J先生拍拖5年感情穩定,就算近日Ella證實患上貝爾氏麻痹症,令到右邊面有面癱嘅症狀,經常要服用高劑量類固醇同滴人工淚水,不過男友都不離不棄,而且對女友悉心照顧,可謂非常貼心。上星期有日傍晚6點幾男友J先生一放工,就即刻離開尖沙嘴診所坐港鐵過中環會合剛剛睇完醫生嘅女友。J先生好窩心一見到Ella就幫佢攞手袋,之後仲負責揸車過咗海,去到加多利山屋企附近嘅勝利道,J先生入咗一間便利店買咗一盒雪糕同麵包。一上返車Ella已經急不及待開雪糕食,但就分甘同味同男友一人一啖。

趁假期出雙入對

前日公眾假期唔使返診所嘅J先生揸車離開寓所,佢先去咗入油同買咗啲杯麵返屋企。到晏晝兩點幾兩個人一齊出嚟,揸車去到大角嘴一幢大廈,之後就上咗樓,相信喺趁假期同朋友聚會。到大概7點Ella同男友離開,雖然已經開始天黑,不過Ella依然戴住副太陽眼鏡。兩個人入咗附近一間茶餐廳開餐,食飽之後再看到便利店買朱古力,Ella雖然病但胃口依然好好。跟住兩個人就好似小情侶咁手拖手行返去攞車,仲不時攬腰非常甜蜜。
Ella噚日喺元朗出席開幕活動,佢話𠵱家面癱嘅情況已經好咗一半,所以心情都輕鬆番啲,Ellla仲話今次好多謝汪明荃同何麗全:「佢哋託人拎咗啲中藥畀我,原來我咁多人錫。」唔知男友有冇趁機求婚?Ella笑笑口話:「我同個女性朋友去咗法國郊區旅行,噚日先返香港,見男友時間之前仲少咗!」
採訪:陳辰、畢紹基、文國駿
攝影:羅德光、吳耀輝

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載