› 選擇地區
三藩市
紐約
洛杉磯
其他美國地區
香港 台灣 北美
 
2014年11月11日

心痛女兒受壓 苦勸退出娛圈
Liddy媽咪眼濕濕 原諒彭順

【《蘋果》獨家專訪】

【彭順傷李心 之親情可貴】現年27歲的李悅彤(Liddy),今年年中被本報拍得與李心潔的導演老公彭順在圓方咀嘴,孭上小三之名的Liddy再被爆父親為啟晴邨槍擊案吞槍自殺的疑兇。飽受失戀及喪父之痛的她避靜半年後,昨日再次投入工作,與母親手拖手拍攝有線電視節目,二人稍後起程到泰國取景。兩母女在中環一教堂接受本報獨家專訪,首次露面的Liddy媽咪坦言支持女兒決定,更講到眼濕濕,她表示沒有怪責彭順,因家中有個規矩「18歲以後要對自己負責。」

採訪:黃曉妍

相關新聞:做小三父吞槍轟動全城

【母女扶持 重新出發】

上星期四李悅彤剛度過27歲生日,昨日她穿上白色外套、牛仔褲與媽咪在中環一教堂內,為有線拍攝旅遊節目《帶阿媽去旅行》作為復出頭炮,兩母女稍後會跟隨製作隊伍到泰國進行外景拍攝,昨日二人接受本報獨家專訪。雖然編導揀選教堂取景,純粹是因為環境優雅,不過對於飽受流言歷練的兩母女來說,教堂對她們有着重新出發的意思。二人在節目中深情對話,盡訴母女情,心情輕鬆不少的Liddy拖住媽咪散步,合照時又輕輕搭住膊頭,在這段日子,家人的無限支持,令Liddy獲得重新振作站起來的力量。

相關新聞:Coffee敞開胸懷潛水

記:記者 媽:Liddy媽咪
記:你見到個女復出,會唔會好安心?
媽:梗係有!
記:支唔支持Liddy復出?
媽:支持!全力支持,工作行先吖嘛!
記:當初嗰件事(啜爆彭順)之後,怕唔怕Liddy再受到壓力,叫佢唔好做呢行?
媽:梗係有啦,但一切隨緣。
記:不過Liddy好想喺娛樂圈發展?
媽:佢自己有思想囉,我叫佢隨緣。
記:會唔會好心痛個女?
媽:梗係有,始終係自己個女。
記:有冇好嬲對方(彭順)?
媽:冇,咁又唔會,我哋信佛唔可以嬲人,呢啲都係一個成長嘅階段,我哋屋企嘅細蚊仔到18歲以後,就要對自己負責任,學識自己長大,𠵱家社會同以前唔同,管得太多反而會反叛,𠵱家細蚊仔好難搞,哈哈,咁樣可以令佢早啲長大。
記:前夫性格如何?
媽:(嚴肅起來,帶點傷感)嗰啲唔好提喇,尊重佢,人都走咗咯!

【Liddy悟透人生】

「好與唔好嘅事都會令到人成長。」Liddy在媽咪身上學會這人生道理,經歷父親離世,Liddy更加明白生命短暫,拍拖到失戀其實是一件小事,做到真正放下,就算與彭順,或是李心潔合作都不會介意。

記:記者 李:Liddy
記:幫有線拍節目,係你復出嘅第一個工作?
李:係,可以咁樣講。
記:𠵱家心情點呀?
李:都幾輕鬆,當去旅行,同媽咪去旅行。
記:好耐冇同媽咪去旅行?
李:都唔係,之前先去完泰國玩。
記:今日喺教堂取景,係咪寓意一個重新開始?
李:我諗都有,其實早早自己已經重新出發,覺得任何事都好,都應該放低,要放下,真正重新再出發。

唔抗拒拍彭順電影

記:同李心潔一樣都係放下,大家都放低咗?
李:(笑,望一望媽咪)大家有啲經歷之後,係會有啲得着,任何一啲好同唔好嘅經歷,都會令到一個人成長。
記:你之前講過唔介意同李心潔有合作機會?
李:我經歷咗好多嘢,好多事我都睇得好化、好淡,好多嘢都隨緣。
記:唔抗拒同李心潔合作?
李:你真正做到放下,其實任何嘢都唔係一回事,人生在世係好短暫、好脆弱,應該要珍惜身邊所擁有嘅嘢。
記:咁彭順呢(合作)?
李:(大笑)關佢乜事呀?哈哈哈!
記:如果有人搵你拍電影,係彭順執導,你會唔會接拍?
李:總之任何機會,自己鍾意角色,我唔會理周遭一啲外在嘅原因,總之係我鍾意嘅角色,鍾意呢行,呢啲工作我會全力去做。
記:睇得咁開?
李:媽咪好大功勞,因為媽咪信佛,所以呢段時間不停向我灌輸好多正確人生嘅道理,點樣睇一件事,人在世好短暫,你將任何嘢放到咁大做乜啫?其實係好小嘅一件事,係塵埃,唔需要耿耿於懷喺心入面。

「將愛畀晒媽咪」

記:你同舊愛Simon復合?
李:唔係,其實真係好朋友嚟,始終我同佢拍拖7年,好多時大家都唔需要講嘢,會好清楚呢個人係點,所以喺我最失落嘅時候,有佢肯扶我一把,好感謝呢啲好朋友喺身邊,呢個恩情,我會一世記住,會報答。
記:Simon會唔會想同你復合?
李:工作方面我都隨緣,何況係感情呢?感情嘅嘢更加估唔到,反而係open、隨緣,我唔會執着。
記:你𠵱家係單身?
李:單身。
記:有冇人追?
李:(大笑)我諗我𠵱家見到男人會驚。
記:有陰影?
李:唔係,做朋友先,好多嘢都唔使咁急,我27歲啫,流流長。
記:呢件事之後,有乜嘢想同媽咪講?
李:媽咪係我人生入面最重要嘅人,會錫佢,將爹哋媽咪一鋪過將啲愛畀晒佢,媽咪對我嚟講好緊要,所以媽咪你要身體健康。

【三個粉絲去首爾】
追星實錄,即上韓劇讀: http://hk.apple.appledaily.com/kstar

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載