› 選擇地區
三藩市
紐約
洛杉磯
其他美國地區
香港 台灣 北美
 
2014年12月23日

馮仁昭四圍超:君如扮Man剝衫 晒腹肌人魚線 - 馮仁昭

吳君如曾經喺電影《金雞sss》利用特技倒模隆出38G巨胸,今次喺電影《12金鴨》繼續玩特技倒模,今次君如由晒事業線嘅金雞改為晒人魚線嘅金鴨,喺噚日曝光嘅預告片上,剝衫正所謂巾幗不讓鬚眉,君如同六位男模齊齊露人魚線胸肌,實在可以以假亂真!

初初有啲尷尬

為咗呢副「胸肌」,君如事前花咗唔少準備工夫,佢苦笑咁話:「今次呢副『胸肌』同之前《金雞sss》嘅38G巨胸,都係專登喺泰國請咗特技師傅做,上一次焦點集中喺上圍,但係今次集中喺上半身,所以要加倍努力做運動同節食,嗰塊『人造皮肌肉』有一定嘅厚度,若果本身唔夠纖瘦,睇落就會好臃腫,變咗我同嗰幾個男模一樣,只可以食雞肉同菜keep住!」不過袒露胸肌行嚟行去,君如坦言有少少尷尬,佢話:「明明知道着咗一塊皮,但係最初都有啲唔慣同唔好意思,感覺好似冇着衫,但係𠵱家我同呢塊人造肌肉已經人皮合一,我好羨慕呢班男模嘅身材,但我同佢哋唔同,我唔使練,只要用幾粒鐘已經有,仲好逼真㖭!」

喺預告片中,又見到有個黑人壯男去廁所嗰陣,望見企喺隔籬嘅君如後,嚇咗一跳咁話:「嘩!有冇咁乸勁呀?」君如即刻得戚咁答:「未算,仲有更乸勁!」令在場唔少工作人員睇完之後大笑!
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載