› 選擇地區
三藩市
紐約
洛杉磯
其他美國地區
香港 台灣 北美
 
2015年01月16日

【七不思議】
一言棠:永遠的五歲 - 歐錦棠

梁振英在施政報告講述房屋問題,提到被個五歲小朋友向他發問:「行政長官,我大個之後住邊度?香港仲有冇足夠土地?」假如五歲港孩果真老積如斯,假如梁特首大話當人情精神分裂症候冇發作,則港人之福,香港有救,相信「香港幾時有真普選?」「你袋嗰五千萬喺咪用本票入㗎?」之類問題好快會相繼出爐,至於大個住喺邊、夠唔夠土地,一切一切,對於CY來說,自然有好多討論空間,最緊要在基本法框架內討論。(喂問住邊咋喎!係,總之煮飯落雞汁定雞粉好,都要在基本法框架內求同存異、有商有量)而且按過往慣例,面對個別問題,佢通常都不予回應,所以即係冇講過,而且,如果大家冇失憶,如果互聯網紀錄冇被清洗,只需上網打幾個字,你會發現,繼2013年佢喺地區諮詢論壇曾經用過「一個四、五歲的小朋友乜乜乜……」之後,2014年的施政報告再翻兜「一位幼稚園生點點點……」前後三年,埋到佢身都係小朋友,以受細路歡迎之程度計算,足以媲美聖誕老人同多仔佛,都係嗰句,如果佢大話當人情精神分裂症候冇發作的話。

個個要贏在起跑線

當然,有人對一個五歲小朋友竟然一錘定音,帶出香港長遠房屋發展問題而表示質疑,我就表示絕不出奇,港人父母要子女先贏在起跑線非昨日始,經典例子之一:不過是幼稚園學生柴娃娃表演「白雪公主與小矮人」,經過選拔,定了角色,最後都由於家長眼紅條氣唔順,由本來家長間互相排斥惡鬥,演變成集體投訴發爛渣,齊心詐型,老師一礙於形勢,二為保飯碗,惟有順應民意,結果一套劇全班十幾人,最後個個靚靚漏漏做皇子、白雪公主,邪惡皇后巫婆不見蹤影唔在講,侍衛隨從同七個小矮人無人問津更是常識,於是,故事改寫,價值顛覆,人人都是主角,故事如何推進不是重點,至於故事背後意義……儍的嗎?以上例子,千真萬確有血有肉,時有聽聞,所以,既然幼稚園塞豆窿學習生字範圍已經包括「Luxury」的話,那超級港女晒命擁有一千對鞋簡直是人之常情;等到成家立室之日排隊敬酒至講「新郎哥敬酒,買車又買樓」,已經等如輸到貼地,咒佢全家,如今應該「未學行、先學上樓」才是硬道理,講人話。所以,在CY眼裏如今香港地老者無所靠,其他皆廢青,惟有扮披着叮噹的時間布永遠停留在不變的五歲,才有生存價值。

【一言棠】
撰文:歐錦棠

除表演藝術,也酷愛文字、影像及武術,其文章往往一針見血。

本欄逢周五刊登

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載