蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年01月21日

樂小姐鬥唔過余詠珊
拉杏兒楊怡過檔nowTV

現年五十五歲嘅樂易玲喺大台做咗十一年,一向被重用,不過自從余詠珊返咗無綫得勢之後,已經屢傳樂易玲失勢,昨日仲有報道指,樂易玲鬥唔過余詠珊拉隊去nowTV,話晒一直有傳曾勵珍同樂易玲喺大台「鬥法」多年,依家多咗余詠珊加入,爭權問題更加激烈。

昨日周刊指,余詠珊多得新老闆「殼王」陳國強撐腰,現時地位穩如泰山,仲可以帶挈一班「舊公司」愛將黃翠如、洪永城等,另一製作部高層曾勵珍都穩守,得大台重用,但該報道就表示,有傳樂小姐係前朝老闆六嬸方逸華嘅人,目前大勢已去,甚少再出席大台活動,傳最近樂小姐將拉一啲小生花旦過檔去已獲發免費電視牌嘅nowTV,首批人選係胡杏兒、楊怡及吳卓羲等人。

該報道表示,有傳「樂大媽」頭號愛將林峯目前已離巢,改簽英皇娛樂,唔再係「親生仔」,年中就要轉會過now嘅樂易玲,一直手執藝員部,相信佢嘅江湖地位都可能召喚一班小生花旦埋佢班。

報道更指出now台藝員部都想效法外地電視嘅合約藝員制度,唔局限藝員只係一個電視台亮相,變相都好吸引一啲enjoy「自由身」嘅藝人,據知樂易玲撬走嘅目標有上年約滿大台嘅杏兒、今年約滿嘅吳卓羲同年底約滿嘅楊怡,有指阿怡因前經理人嘉莉走人,令楊怡想離巢,報道又傳,now亦肯出高價吸引藝人加盟。

不過,報道就曾問過now免費台首席副總裁何麗全就話佢哋未正式開始製作,冇咁快,認為樂小姐喺TVB做得咁成功,點會走,暫時都佢哋都係同內地拍劇合作,唔知係唔係仲未講得住,定係「空穴來風」咋?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載