› 選擇地區
三藩市
紐約
洛杉磯
其他美國地區
香港 台灣 北美
 
2015年01月22日

網民等巴士…
發哥親上前:你好,我係周潤發

「高大靚仔有型」嘅萬人迷周潤發,一直都係港人心目中嘅偶像,發哥向來好親民,喺香港出入只係坐地鐵、巴士等,大家如果有幸嘅,隨時喺街上,見到呢位「民間特首」,身邊絕對唔會有保鑣阻住你埋身,勝在港人同要求影相嘅人都好自律,唔會令發哥受驚。

發哥亦都講過唔少人同佢素未謀面,但就默默支持佢咁多年,求合照都只係幾分鐘,發哥覺得唔應該拒絕對方。如果大家肯大膽啲,要求發哥合照,仲可以享受到發哥「獨有嘅selfie技巧」,影得唔錯㗎!真係要問句:「你同發哥selfie咗未?」

好似噚日本報發放發哥喺機場「電暈」空姐、特警嘅影片同圖輯,即勾起好多網民嘅回憶,原來唔少人遇過發哥,仲紛紛上蘋果fb分享「集郵經歷」添,例如有以下呢幾個:

1.「是咁的:等巴士見到後幾個身位好似發哥,叫個fd望吓,佢睇都冇睇,好大聲講『咁易喺街撞到發哥咩~』跟住發哥上前來自我介紹:『你好,我係周潤發』即時全隊影相攞簽名,我開心到暈咗…」

2.「佢真係俾你哋影到夠晒先走..身邊冇保鑣,見過佢喺九龍城行(估佢去街市)有OL加學生妹。同佢影相都笑晒口,仲要拎簽名嗰時問埋使唔使你男友簽埋(可能聽到個女仔同男友講見到發哥)真係俾佢笑死…」

3.「發哥真係好親民!話說嗰陣同兩位朋友喺機場接機,喺等嘅時候,我朋友突然話『發哥!』,之後我兩位朋友就慢慢跟住佢哋話想影相,點知嗰陣,佢哋要入lift,正常反應都會覺得佢應該趕時間之類,但點知發哥一句『入埋嚟啦』,朋友就諗住喺lift影相,但機場啲lift真係好暗,點知一出lift,發哥就好自動拎我朋友電話開始同我朋友自拍,其實我都係企埋一邊,但發哥都自動過嚟同我影埋,嗰刻心諗,如果發哥係香港特首就好喇!最後我就影咗張我冇望到鏡頭嘅合照。」

4.「發嫂好幸福,發哥真係好到唔知點形容。我見過好多藝人,佢係唯一一個主動同我打招呼,而當時仲係正值佢最紅嘅時候。有禮貌又毫無架子,除咗佢仲有奇洛李維斯,永遠難忘!」

另外,更有網民反問,發哥究竟同過幾多人影selfie?其實翻查微博及網頁打「發哥」,又真係有好多人同佢影過合照㗎!唔知大家又有咩同發哥嘅經歷呢?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載