› 選擇地區
三藩市
紐約
洛杉磯
其他美國地區
香港 台灣 北美
 
2015年02月06日

張家輝直認有私心
想香港女演員膺影后

張家輝、鮑起靜(鮑姐)及盧海鵬,昨日出席「第三十四屆香港電影金像獎」記者會,張家輝未能憑《盂蘭神功》入圍新晉導演獎,連鮑姐都話戥佢唔抵,鮑姐表示睇好家輝入圍此獎項,惟事與願違。

對於被鮑姐睇好,但始終未獲新晉導演提名,家輝大方回應:「自己籌備緊第二套鬼片,覺得自己上一套未盡全力,希望呢一部再有機會提名,因為新導演有兩次機會提名,如果大家覺得我ok,希望再攞到提名。」

家輝表示未公佈提名名單時,一路都覺得呢個獎,係應該留返畀一啲更年輕新導演,佢話:「好過畀自己入圍或拎到,因為咁樣更加有鼓勵性。」佢又笑言未試過自己入唔到圍,但都咁開心。

另外,講到今屆男主角提名,佢開頭話唔講住,又話個個都係朋友,經再三追問,佢就攞住份名單喺度睇。家輝表示:「覺得自己喺《魔警》戲份唔多,覺得自己係男配(角),但公司報我選男主角,覺得有少少妙想天開。」

咁其他男主角又有乜心水?家輝就話:「個個都有實力,彭于晏喺《黃飛鴻之英雄有夢》賣命演出,佢係一個十分努力演員。」但就未睇劉青雲《暴瘋語》及黃渤《親愛的》,佢又讚吳彥祖喺《魔警》有突破演出。

咁家輝又點評女主角呢?佢話:「君如喺《金雞sss》搏到盡,0依家《金鴨》(12金鴨)又扮我整幾嚿腹肌,雖然佢搞黃業,但搞得好認真,好盡心盡力,所以都希望佢繼續搞呢個黃業。」

家輝表示冇睇過湯唯嘅《黃金時代》﹑蔡卓妍《雛妓》及趙薇《親愛的》,但佢話對女主角自己當然有啲私心:「希望係香港女演員拎返,因為咁樣更加有鼓舞。因為自從合拍片之後,好多時女演員變內地演員,香港女演員變得萎縮同少咗,見到今年有兩個本地女演員提名,好值得鼓勵,自己私心都係想香港女演員拎。」

相關新聞:最佳電影:《紅VAN》VS《黃金時代》

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載