蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年02月08日

隱瞞秘密二十四年
馬神爆朱咪咪係阿嫂

娛樂圈有好多不為人知的關係,朱咪咪和「馬神」馬德鐘原來都有密切關係。前晚「朱咪咪我做晒演唱會」一連兩晚紅館騷開鑼,擔任嘉賓的馬德鐘公開了一個隱瞞二十四年的秘密,他大叫朱咪咪做「阿嫂」,原來馬德鐘胞兄就是朱咪咪的丈夫。

拍劇冇對手戲

馬德鐘入行多年,一直未有公開關係,直至前晚他可能站上紅館舞台唱歌,感覺輕飄飄,所以玩踢爆說:「多謝阿嫂畀呢個機會我,等我可以喺紅館唱歌。」朱咪咪搞笑說:「我雲英未嫁。」馬德鐘一再強調:「但你真係我阿嫂喎!」朱咪咪不認不認還須認:「唉……佢哋(指觀眾)唔知㗎!」馬德鐘則繼續爆料:「但我真係見到你有兩個仔,你真係我阿哥個老婆!」咪咪姐沒好氣,即刻扮嬲說:「你𠵱家係咪玩踢爆?其實佢真係我叔仔,入咗TVB咁耐,都冇乜人知呢個關係,仲要咁耐都係合作過一套劇,仲要冇對手戲,只係喺畫面見到面。」之後兩叔嫂合唱一首《相逢何必曾相識》。

向修哥講粗口

除大玩尋親記,朱咪咪演唱會入面爆笑連場,加入韓國熱播歌《江南Style》和《Fantastic Baby》,最爆是嘉賓胡楓(修哥)和譚炳文組成「八十後組合」,台上又播放劇集《來自星星的你》主題曲。「八十後組合」穿上西裝,梳了一個都敏俊髮型,咪咪姐對着他們講韓文:「Oppa(哥哥)、噩多茄(怎麼辦)同鏡餐拿喲(沒關係)。」譚炳文與修哥說:「個肥婆喺度嘈喧巴閉?佢仲話要『屙篤茄』喎,點搞?」修哥回應說:「唔好理佢啦。」咪咪姐即刻說:「嗲!嗲!嗲!」然後譚炳文說:「佢仲要講埋粗口喎!嗲我喎,點算?」修哥說:「咁你嗲番佢啦。」三人大放笑彈,逗得現場觀眾笑聲不絕,所以未過年,朱咪咪已經在紅館自備環保袋狂收利是。
採訪:譚倩宜
攝影:沈健程

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載