蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年02月14日

情人節專輯:娛圈小夫妻
情人節愛鬥氣

情定今生。
由情侶昇華成夫妻並不簡單,同於去年出嫁的袁彌明和楊洛婷,將要度過婚後第一個情人節。兩對新婚夫婦大耍花槍晒幸福,袁彌明獲老公林雨陽爆幸福宣言,自願當一世「勞工」。楊洛婷與老公黃天翱邊嘆西班牙菜,邊互相搞笑鬥嘴。將成人夫的「港版半澤」陸駿光則與圈外未婚妻茵茵在韓國浪漫滑雪,迎接婚前最後一個情人節。
撰文:比華利

【袁彌明老公=勞工】

袁彌明:34歲
林雨陽:38歲
拍拖幾耐:1年半
結婚日期:2014.12.27

做了個半月人妻的袁彌明,與「謎網」行政總裁老公林雨陽今年首度以夫妻身份過情人節,甜蜜程度有增無減,兩人日前拍拖遊中環嘉年華,童心未泯大玩機動遊戲,坐上旋轉木馬和碰碰車即勾起他們的童年回憶,林雨陽還做「銀神」落力為愛妻擲公仔,結果滿載而歸。袁彌明縱使已找到人生路上的白馬王子,騎旋轉木馬時仍與老公手牽手。狂玩一輪機動遊戲熱身後,他們便轉玩溜冰,袁彌明坐在溜冰椅,任由老公林雨陽推着她在冰上滑行,兩人玩到攰又買棉花糖醫肚,還互餵冧對方,最後情深咀嘴甜到漏。

匿埋過二人世界

升呢人夫的林雨陽日前在facebook留言:「老公,其實是勞工。」同時貼上疲倦樣子公仔,非常抵死,林雨陽無奈說:「老婆係老闆,老公係勞工,我係冇人工嘅勞工。」袁彌明反駁:「你咁同我計,咁畀你一毫子一個月啦,其實我哋結咗婚,佢都冇畀家用我,又冇附屬卡。」夫婦即場耍花槍,袁彌明投訴老公起身唔幫手執床鋪,林雨陽知衰:「我犯咗每個男人都會犯嘅錯。」兩人婚後首個情人節會考慮匿埋屋企二人世界,林雨陽口口聲聲要平淡度過:「情人節留番畀未結婚情人,我哋唔想去搶高啲物價。」袁彌明有夫萬事足,她自爆會親自炮製住家菜慰夫。

【楊洛婷甜嗒心形扒】

楊洛婷:33歲
黃天翱:33歲
拍拖幾耐:8年
結婚日期:2014.12.12

楊洛婷和Dear Jane主音歌手黃天翱(Tim)去年十二月在夏威夷成婚,新婚夫婦迎接第一個情人節一如以往繼續鬥氣。鏡頭前楊洛婷和Tim恩愛非常;鏡頭後楊洛婷全程主導,Tim扮作言聽計從,有時說話又毫不客氣,場面搞笑。
自稱是「黃C9」的楊洛婷信奉回教,知道Tim鍾意食豬,便帶老公去西班牙餐廳食頂級黑毛豬,她說:「雖然我係回教,但係我都會畀我另外一半食豬肉,我知佢好鍾意食黑毛豬,所以嚟間西班牙餐廳,但係佢都好錫我,冇叫到豬肉畀自己食!」Tim百般遷就,黃C9心花怒放,Tim直認在情人節準備了一連串驚喜。

蝦碌落糖扮好味

提到驚喜,黃C9突然無明火起,她笑着跟Tim說:「不如你講下第一次煮牛扒畀我。」Tim說:「情人節買咗啲好靚嘅和牛去煎心形牛扒,之前我媽同妹煮完嘢食,將鹽同糖倒轉擺,所以嗰日食嗰啲嘢全部都好sweet。」黃C9忍不住說:「因為佢第一次煮嘢畀我食,要扮好好味呀!但我都係忍唔住去廚房睇。」
之後黃C9繼續狂數說:「真係唔送好過送,八年前情人節送咗個水晶牌子禮物,見到個盒我好開心。」Tim說:「係呀!一隻米奇老鼠頸鏈。」楊洛婷搶答:「我哋就係間舖頭出面嗌咗一場交,然後我refund咗呢份禮物,因為我覺得點解會買份咁幼稚嘅禮物送畀我?我咁大個人,點解會買啲咁小朋友嘅頸鏈畀我,第一年情人節係幾難忘。」
撰文:楊潔雯
場地:Viva Ana Tapas and Wine Bar

【陸駿光雪山影婚照】

陸駿光:37歲
茵茵:27歲
拍拖幾耐:3年多
結婚日期:今年8月

「港版半澤」陸駿光將於今年八月與圈外女友茵茵拉埋天窗,雖然港視藝員合約快完,但他性格樂觀,最近更獲贊助到韓國拍攝婚紗照,並順道預祝情人節兼自己的三十七歲生日,可謂一舉三得。他笑說﹕「我哋拍拖三年幾,講好節日唔送禮物畀對方,寧願留番啲錢去旅行。」
陸駿光首次到韓國旅行,除品嚐韓式石春燒烤外,還有去滑雪,但因「雞同鴨講」搞出好多烏龍事,他說﹕「初時唔知要買pass先可以坐纜車上雪山玩,搞咗一輪又要落山買pass。好彩我生日有優惠,買飛時有人同我唱生日歌,好開心。」陸駿光皮膚黝黑,還以為是運動健將,但原來對滑雪一竅不通,還要女友教他,他說﹕「我跌到pat pat好痛呀,好彩最後都學得識,最開心係臨走前一個鐘落雪,好浪漫。」
撰文:嵐山

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載