蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年02月27日

一路向北:徐錦江走過抑鬱十年

徐錦江離港於中台兩地發展,曾因劇接劇患上抑鬱症。攝影:陳順禎

人生過了半個世紀,徐錦江是九十年代三級片的靈魂人物,拍過不少經典作品,在港沉靜了一段日子,這段時間他在內地發展,同時也患上抑鬱症,不過徐錦江從未想過息影,現在更會享受人生。徐錦江作畫多年,由做藝術出身,到加入影視圈,現在他還原基本步,花時間在藝術工作,徐錦江希望自己每一個十年,都會不一樣。
撰文:溫敏芝

相關新聞:自封禮拜日畫家

現年五十三歲的徐錦江,八十年代出道,拍過不少經典三級片《玉蒲團之偷情寶鑑》、《青樓十二房》、《滿清十大酷刑》等,更於九七年憑《色情男女》提名金像獎最佳男配角,其所演的鰲拜及金毛獅王也為人津津樂道。徐錦江為客串新片《壹獄壹世界:高登闊少踎監日記》重返香港,早前他在筲箕灣接受本報專訪時說:「對上一次拍香港電影係○三年嘅《一代宗師》,不過嗰次冇返香港開工,今次係十年後再返嚟拍戲。」

劇接劇躁爆

徐錦江當年離港後於中台兩地發展,原來患過抑鬱症:「都有十年前嘞,我都停過一段時間冇拍戲,嗰時喺台灣拍戲好長時間,有段時間乜戲都接,我喺橫店同時間拍幾個劇,一換第二套衫又企喺個景度,真係人都癲,嗰時我好躁,成日自己發脾氣,一下就爆發出嚟,嗰時佢哋話我係拉登恐怖分子,試過突然話唔拍就唔拍,將啲衫呀、頭套全部丟晒。拍劇集《西遊記》時,佢哋話只要大俠(徐錦江)唔發脾氣,即刻諗去邊度食飯。」
徐錦江患抑鬱症期間需要服藥,在台灣及內地都有看過醫生,他說:「食嘅藥好多係畀你好安靜瞓覺,等你情緒好穩定,不過食咗藥會冇記性,講嘢都會唔清楚,嗰時做戲講對白都有問題,我都醫咗一段長時間,雖然𠵱家唔使食藥,但我到𠵱家都瞓唔到覺,有時瞓覺覺得好受束縛,好想落花園,瞓喺草地。」

怕再做鰲拜

畢業於廣州美術學院的徐錦江,是嶺南畫派宗師關山月的弟子,擅長畫作及雕塑,入行前是做藝術工作,他說:「呢兩年畫多咗畫,我夏天唔拍戲,因為太熱嘞,秋天先會拍番,同埋做演員咁長時間,好多角色自己拍過,已經冇令自己好激情、好想拍嘅戲,好似鰲拜同金毛獅王咁,𠵱家啲人仲搵緊我拍,我直情怕呀,劇本都唔想睇。」

問到是否仍有人找徐錦江拍三級片?他爽快直認:「有呀,但唔諗嘞,曾經叫做係經典,大家同自己都覺得OK,我唔想再去做,我冇攞過獎,不過我都提名過金像獎,對自己有個交代,應該去做另一樣嘢。」他坦言想每十年做一件事對自己交代,他的人生花了十年拍電影,十年拍電視,十年畫畫,問他下個十年會計劃甚麼?他說:「𠵱家搞緊收藏木頭家具,同埋推出一本藏珍集,通過物件去講我嘅事迹。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載