› 選擇地區
三藩市
紐約
洛杉磯
其他美國地區
香港 台灣 北美
 
2015年03月06日

我主場:楊英偉被迫轉型
「諗起忍唔住喊」

在港視劇《選戰》中楊英偉被廖啟智鍊實下體,專訪當日楊英偉作狀扮苦情。攝影:仇志德

【維基解密之黯然離場】「我哋呢個年紀嘅演員,記到台詞同埋可以演唔同角色,慳到錄影廠時間,又可以教到新人,係好值得繼續有工作。我唔知係咪生不逢時,以前演員好受尊重,但係我𠵱家唔知仲有冇得拍。」一段簡單的對話,道盡不少資深演員的心聲。入行超過廿年,經歷過電視圈興衰的楊英偉,前年毅然離開無綫,轉投港視,以為可以在事業上有新衝擊,港視發牌夢落空,變相令這類多功能演員黯然離場,英偉直言:「諗起都忍唔住喊!」
撰文:何慧斯

曾經因為《真情》林木川一角而被人認識的楊英偉,當日木川並未有為他帶來更好的機會,雖然拍過超過五十套電視劇,更畢業於浸會大學兼香港演藝學院,可惜不單止未見有發揮機會,甚至試過拍只有一句對白的戲,他說:「第一日入行,見到啲前輩,做咗好多年都擔心份合約會點,夠唔夠騷,原來唔夠騷要還,我慶幸冇試過唔夠騷,因為我乜都做,試過連士兵甲得一句對白都做。」他續說:「嗰次係《巾幗梟雄》做郭鋒啲士兵,連鄧萃雯都問我點解要做?我咪話佢畀通告我咪做,好過到時人哋叫你還騷,過唔到自己嗰關都要過,因為如果你唔夠騷,唔單止要還,可能連將來續約嗰陣可能會CUT騷,你寧願低低地跌鋪抑或冇糧出?我寧願低低地跌鋪。」

「𠵱家最慘係冇得做」

楊英偉更有感而發地說:「我自己有時諗,以我當時嘅學歷,三十年前大學畢業,真係做乜都得,我有好多同學,做到警司、校長,有啲喺懲教署好高級,我唔係話要以職級同收入去分,只係有咁嘅料,但係做到啲乜嘢出嚟?做演員要面對好多嘢,唔一定要紅,不過起碼要有得做,𠵱家最慘係唔止我,係好多人都冇得做,嗰個情況唔係話你有冇知名度、有冇料,又唔係話個市場唔需要,又有人肯投資,只係政府鍊住呢樣嘢。」
言談間楊英偉更忽發奇想地說:「我真係想去申請,將拍港劇嘅演員,申請列入非物質文化遺產。我好覺得可能過咗十年、二十年,擔心港劇未有得繼續,譬如話王維基唔會再有牌,可能佢唔搞,呢啲又冇得怪佢,揼咗咁多錢都攞唔到個牌,TVB冇得好講,唔係話覺得佢唔好,但係始終一台獨大,冇咗競爭,好似有少少失咗方向,將來TVB繼續行落去,可能變咗係內地畀劇你播,整吓整吓兩線都係播內地劇,我哋同內地任何一個地方冇分別,我唔係陰謀論,只係大勢所趨,對領導人嚟講,唔覺得係乜嘢一回事,但係對拍港劇演員嚟講,係冇咗飯碗,冇咗出路,甚至冇咗呢個幾獨特嘅藝術方式,有時夜晚諗諗吓都會喊。」

轉型做飲食節目

在拍攝期間,英偉主動表示要表演一段默劇,最初他未有提及內容,不過看了一會便感受這個演員被困在一個困境,苦找不到出路,正好印證了目前的境況,在這不明朗的因素下,英偉坦言被迫轉型,他說:「我哋呢個年紀嘅演員,記到台詞同埋可以演唔同角色,慳到錄影廠時間,又可以教到新人,係好值得繼續有工作。我唔知係咪生不逢時,以前演員好受尊重,但係我𠵱家唔知仲有冇得拍,我同港視嘅約去到十一月完,你問我收唔收人工都好,可以簽散,𠵱家都開始轉型做飲食節目同搞飲食團,亦都有自己嘅製作公司,雖然個人經濟冇問題,但係感受真係好難受,試過夜晚諗諗吓都忍唔住喊。至於最終會否黯然離場?他直言:「唔知,但係有好多人已經唔見。」

【智叔留力 表情搭夠】

在港視劇《選戰》,楊英偉在飾演江日東一角,在劇集尾聲時,代王主任向廖啟智飾演的宋漫山傳達中央希望他好好休息,養好身體,好體面退出令選舉流選,結果宋漫山出力鍊實日東下體回應王主任的說話,不少網民看到楊英偉面容扭曲,坦言「隔住個芒都覺得痛。」重提這一場戲,他說:「我哋本身好熟,一啲都冇嘢,拍嗰陣智叔嗰五隻手指係完全接觸晒我嘅重要部位,當然演嗰陣係留力,靠表情做足!」他更說:「我做飲食節目嗰陣,有啲聽眾,佢哋喺fb話好想睇《選戰2》,個個都問我邊個選出,我梗係唔會講,不過我有問過kk,佢話其實寫咗三十集,𠵱家拍咗頭十五集,佢同我講我嗰條線跟住仲有,我都有問王主任究竟係邊個,但係佢唔肯講。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載