› 選擇地區
三藩市
紐約
洛杉磯
其他美國地區
香港 台灣 北美
 
2015年03月06日

我Q你答問會:人人問阿澤

螢幕前經常俾女圍的杜汶澤,螢幕後原來都很有女人緣,異性觀眾對他非常好奇,記者在銅鑼灣鬧巿「捕獲」十五位女巿民,年齡由六歲到五十歲不等,她們來自不同階層,當中甚至有內地自由行,眾女連珠炮發欲解構阿澤,問題涉及阿澤和老婆田蕊妮私生活,他對特首女兒梁齊昕看法,以及由他監製、蔡卓妍(阿Sa)主演電影《雛妓》,口不擇言的阿澤還篤爆阿Sa戲中講得流利粗口的秘密。
採訪:魏嘉琳、比華利

Q1.梁太:你講過何韻詩細個幾靚㗎噃,你有冇暗戀過佢?

阿澤:有呀,我好鍾意何韻詩㗎,但冇辦法,佢又唔鍾意男人,希望佢有一日佢會鍾意男

Q2.林小姐:牛歡喜係乜嘢味㗎?

阿澤:牛歡喜羶羶哋,佢似豬肚,有陣羶味,但幾彈牙㗎。

Q3.周小姐:你有冇介意過老婆高過你?

阿澤:我已經咁矮,矮過我嗰啲咪好矮,女人梗係越高越靚,呢個問題應該留番畀王祖藍。

Q4.張小姐:你點睇梁齊昕?

阿澤:我唔睇囉!你做乜要睇,儍豬豬。

Q5.蘇小姐:以你專業嘅角度,你覺得梁齊昕適合演乜嘢角色?

阿澤:冇睇法。

Q6.彭小姐:你監製《雛妓》這部電影,你有沒有親身去體驗過,為製作這部電影拿靈感?

阿澤:噏乜嘢?你冇字幕嘅,香港嚟㗎呢度,做乜同我講普通話?

Q7.陳小姐:阿Sa講粗口講得通唔通順㗎?

阿澤:我覺得阿Sa講粗口好似順過佢講英文

Q8.K小姐:邊個星講粗口最流利?

阿澤:應該係我啩!如果唔係我,仲有邊X個。

Q9.陳小姐:你聽過邊個星講粗口?講得最激嗰句係乜?

阿澤:最激呢……好多星都講粗口,不過我接觸過講得最多就係我同鄭中基……我聽佢講最多嘅係XXX,XXX出唔出得街㗎?「嘟嘟」哋得㗎,你哋成日「嘟」剩少少貨尾。

Q10.黎小姐:你覺得阿Sa有幾多成機會憑《雛妓》攞影后?

阿澤:我心入面,梗係佢最好㗎啦,咁佢演我嘅戲,我當然最想佢攞,但大家認為佢嘅競爭對手就係趙薇,我冇睇佢嗰部戲,我唔知道佢演成點,希望有機會睇一睇嗰部戲先,但我又冇乜興趣,都係唔睇啦。

Q11.梁妹妹:你畀唔畀老婆出夜街㗎?

阿澤:我畀唔畀老婆出夜街,關你鬼事咩,你咁細個。

Q12.陳小姐:你點解仲唔生仔嘅?

阿澤:我自己對香港就覺得好絕望,我唔想我個仔喺呢度出生。我唔鍾意移民原因,我唔想騷擾其他國家嘅人,正如我自己喺香港,我都唔想其他人嚟香港騷擾我。

Q13.何小姐:你同阿田結婚咁多年,係「吵架」吵得最大係邊單呢?

阿澤:都唔記得啦,我哋好多年冇嗌交,相敬如賓周有禮嗰啲。

Q14.施小姐:你老婆鍾意你肥嘟嘟,定係大隻啲?

阿澤:我估佢鍾意肥多啲,我諗多數人都係鍾意肥多啲,所謂大隻都係用嚟拍鹹片,咁𠵱家拍完就冇用㗎喇。大隻嗰啲好辛苦,仲話食呢啲,食魚蛋,食烚蛋就有你份!

Q15.彭小姐:你介唔介意幫你老婆買女性用品?

阿澤:女性用品……咪燕窩嗰啲?你意思係嗰啲衞生用品?咁又冇買過,唔係尷尬,我都唔知佢啱用啲乜嘢。

後記:

面對女觀眾的十五問,阿澤邊篤魚蛋邊答問,二十分鐘全部KO,他風騷說:「冇喇,有冇搞錯,好少fans好冇面,不如摺埋啦!」阿澤無懼問題尖銳敏感,他有問必答:「我冇乜嘢要隱瞞,只有鍾意同唔鍾意,我冇乜怕講。」阿澤最後抵死拿烏龜做比喻:「你問我對烏龜睇法,我本身唔鍾意烏龜,我咪唔講,我鍾意貓嘅,咪講多啲。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載