蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月07日

我主場:完全體吳國敬 谷底爆發

阿敬帶着愛犬郊遊,還給牠彈奏自娛。
攝影:葉君海

人生有幾多個三十年?吳國敬二十歲入行,樂壇打滾三十年,下月紅館開騷,合作過的天王天后將碌卡撐場。阿敬回想那些年的高低起落,嚐盡甜酸苦辣,窮到燶日子冇錢開飯,烚臘腸配即食麵。就是音樂旋律令阿敬緊扣這個行業,近年他再發憤圖強,充滿鬥志,更形容經歷過起跌的自己是「最complete嘅吳國敬」。
撰文:比華利

相關新聞:承諾讓女友嫁得風光

今年六月便五十歲的吳國敬,二十歲時發歌星夢參加新秀歌唱大賽入行,星途不算暢順,由幕前退到幕後當作曲,近年再跳出做唱作人,為紀念圈中打滾三十年,阿敬下月四日起在紅館舉行一連兩場「吳國敬三十載作品展音樂會」。

捱白烚臘腸麵

阿敬當年在新秀歌唱大賽三甲不入,同場被杜德偉捧走金獎,阿敬翌年被唱片監製賞識簽約唱片公司,一九八七年推出處男作《玩火》,歌唱事業露曙光。好景不常,一九九○年吳媽媽不幸在美國發生車禍身故,阿敬受喪親之痛的重擊,變得意志消沉,回憶那段黑暗日子,他眉頭深鎖說:「我接受唔到媽咪死咗,成個人行屍走肉,冇晒鬥志,成個苦瓜乾,完全娛樂唔到人,點有資格做藝人。嗰時我有諗過退出,我覺得自己人生同事業都玩完,成日匿埋喊,成個人冇charm、眼腫、樣頹兼膊縮,邊有台型吸引到人,冇晒啲job,朋友又話我成日黑口黑面,叫我出去食飯應酬,睇見我都影響食慾啦。」
喪志令阿敬事業走下坡,失前途也失錢途,雙失令老本也差不多花光,逼着絕處逢生:「我好鍾意音樂,於是問朋友借咗啲錢,諗住買部電腦,學吓做音樂,試吓作歌,希望轉投幕後重新振作。」阿敬八過行程,知道當年作曲一經錄用每首有六千元酬金:「我冇錢交租,寫隻歌有六千落袋,寫多隻就可以供車同生活,唔使吓吓再食齋麵,我最窮時喺屋企餐餐煮冇餸即食麵,有日我頂唔順摷雪櫃,發現剩番一孖臘腸都拎嚟烚咗佢煮麵,真係……好難食。」

轉型成功翻生

做人窮則變,變則通,阿敬否極泰來,靈感忽如泉湧:「記得我第一個六千蚊係幫李克勤作咗首《一知半解》,跟住慢慢開始多咗人搵我交歌,生活順啲,我又碌卡叫張衞健帶許志安同鄭秀文嚟我屋企揀歌。」如是這般,阿敬越寫越有mood,更一口氣作了一百首歌備用,他得戚說:「呢一百首歌養咗我足足十年,直到二○○六年存貨用晒,我逼住又要加油開工。」
阿敬作曲堅持靈感到才出貨,那幾年他又遇上阻滯,不是病便是跟村屋鄰居發生爭拗,甚至惹上官非,結果連一些商演活動都泡湯。近年噩運過去,阿敬又重新開始,他興奮說:「近排我啲爆炸力返晒嚟,我最近寫起五十首歌,𠵱家陸續分畀歌手。」
在娛圈起跌三十年,阿敬的辛酸只有自己知:「人生就如過山車,有起有落好正常。我覺得𠵱家狀態返晒嚟,無論心態或體能都fit過以前,係最complete嘅吳國敬。」
髮型、化妝:Jennifer Li

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載