蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月10日

澳洲落地生根
小雪三做人妻 嫁嫩口韓仔

現年三十六歲的前歌手小雪,原名蔡雪敏,曾經歷過兩段失敗婚姻,難得她屢敗屢戰,去年三月與第二任丈夫離婚後,再戀比她年少四歲的韓國嫩男。昨早小雪在社交網站公佈上月已與韓國男友Robin Cheung在澳洲註冊結婚,並留言大讚老公勤力及愛錫她的一對子女,兩人明年將在首爾補辦婚宴。

相關新聞:兩段婚姻:前夫偷嗒大乳牛

前歌手小雪於二○○四年下嫁永安旅遊前太子爺陳迅元,後來因陳迅元偷食巨乳女星蔡慧敏而離婚。事隔兩年,小雪帶女兒Ronni改嫁陳姓澳洲籍華人,並於翌年誕下幼子Rocco,但原來這段婚姻有名無實,兩人結婚六年一直分居,獨力照顧一對子女的小雪,去年決定揮慧劍與第二任丈夫離婚,小雪以為坎坷過後無艇搭,但緣份將她帶到現任韓籍老公身邊,展開第三段婚姻。

老公棄韓國工作

小雪昨日在facebook公佈喜訊,自爆上月十四日情人節與韓國男友Robin Cheung已註冊結婚,明年會在首爾補辦婚宴。小雪上載多張註冊時的照片,穿上白色背心紗裙的她,由一對同母異父的子女陪住出嫁,冧爆的小雪不時與老公深情對望,而且錫完又錫,她留言:「緣份真是奇妙,當我在最孤單對婚姻已失去希望的時候上天讓我們相識,我們一同了解對方一同經歷很多事情。」
本報昨日致電小雪,恭喜她覓得好歸宿,她亦感觸說:「真係好開心,註冊當日都忍唔住喊,佢係一個好好嘅男人,為咗我放棄韓國工作嚟澳洲生活,又好努力工作,最重要係佢好愛錫我一對仔女。」小雪笑說:「仔女都好鍾意佢,囝囝仲搞笑,成日叫我結啦結啦,結咗我可以叫佢爸爸喇!」

相關新聞:同期歌手:丁子高轉做公關

冇計劃再生BB

曾經歷兩次婚姻失敗,再婚有否恐懼?小雪承認:「坦白講,失敗咗兩次係有啲驚,但佢不斷付出,我睇到佢好真心,佢父母對我都好好,唔介意我結過婚,接受我嘅過去。」會否再生BB?她說:「暫時冇計劃,佢見到我照顧兩個小朋友好辛苦,而且佢想等小朋友大啲,我哋可以多啲二人世界。」她又自爆註冊時的蝦碌事:「註冊要讀佢個韓文名,我讀咗好多次都讀唔掂,大家都忍唔住笑。」
另外,前B2成員譚嘉荃昨日出席公開活動時恭祝小雪:「好替佢開心,佢去澳洲前有同佢合唱過,未見過佢韓籍丈夫,希望有機會可以親自恭喜佢啦!」而小雪昔日拍檔漢洋,接受電話訪問時說:「同佢仲有喺fb聯絡,祝佢白頭到老永結同心,我知呢個男仔好好,對佢仔女都好好,不過冇諗到咁快又結婚,證明佢敢愛敢做,唔會一朝被蛇咬。」
採訪:小米、皓騫、馬建華

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載