› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

馮仁昭四圍超:周永恒作證冇影
裁判官鬧嘥公帑 - 馮仁昭

周永恒噚日冇出庭,被裁判官鬧。資料圖片

曾有家暴前科嘅歌手周永恒,舊年聲稱喺佢天水圍寓所樓下,俾《忽然1周》男記者襲擊。案件原定噚日開審,但作為事主嘅周永恒卻未有到庭作供,主控解釋佢正喺北京參與私人健身教練培訓。裁判官聞言即不滿話:「選擇訓練都唔出庭!當事人自己都唔care!」直斥周永恒浪費公帑。
控方申請押後審訊,裁判官聽完就問:「你證人準備轉行呀?」控方都話唔清楚,又形容周永恒係藝術工作者,工作日子繁雜,直至𠵱家仍未能派送證人傳票畀佢。裁判官就話:「佢話繁忙,就要被告等。法庭可以遷就證人,但必須合理。」即場就要求控方考慮係咪繼續作出檢控,辯方亦提出案件或可以審訊以外嘅方式處理。不過控方最終決定堅持繼續檢控,案件押後至四月十六日再訊,五月四日開審。
被告貢程詩(四十歲)就否認去年十一月十八日,喺天水圍嘉湖山莊翠湖居地下卓思傑教育中心外襲擊周永恒。

阿Yu:冇同佢聯絡

正同周永恒分居嘅趙頌茹(Yu),噚日就同張文慈(Pinky)、陳啟泰同邵音音喺上環出席有線電視飲食節目《小店大廚2015》宣傳活動。對於周永恒冇上庭,阿Yu平淡咁話:「呢個人喺我生命中告一段落,自己嘢自己負責,冇同佢聯絡。」
阿Yu對於梁齊昕傳出家暴事件感慨話:「我生咗兩個女先理解阿媽係幾愛我,如果溝通係可以解決問題,希望佢哋可以溝通解決,家人關係得來不易,希望佢哋身體同心靈健康。」
案件編號:TMCC3667/14
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載