› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

「失場死性不改 傷盡向太心」
向華強數臭栢芝 永不錄用

現年三十四歲的張栢芝與謝霆鋒離婚後,電影六連仆慘變票房毒藥,幾乎沒公司敢再搵她拍戲,幸獲前老闆兼恩人向華強太太陳嵐仗義相助,冒險起用她孭飛拍攝投資數億元的巨製《3D封神榜》,怎知開工兩個月,栢芝竟頻失場扭計兼冇心演出,令向氏夫婦對她徹底死心,昨日向華強怒轟栢芝反轉豬肚就係屎,決定飛起栢芝,永不錄用。

相關新聞:向華強:栢芝演女人冇人睇

張栢芝和前夫謝霆鋒離婚後復出拍戲,可惜連環失利被封票房毒藥,大前年拍完電影《危險關係》後,票房六連仆嚇走投資者(詳見另文),在事業上頻頻受挫的栢芝,去年九月又因霆鋒和舊愛王菲世紀復合,情緒大受打擊下她致電跟向太哭訴,當時向太心痛栢芝的遭遇,力排眾議起用她在巨製《3D封神榜》扮演哪吒,與李連杰、梁家輝、古天樂、黃曉明等合作,希望助栢芝起死回生。
然而電影在內地開拍了兩個月,據知栢芝卻頻頻失場,近月與內地隱形富豪孫東海交往的她,就算現身拍攝現場都冇心機做戲,只掛住沉迷玩手機,完全沒有演員操守,表現遊魂交行貨,死性不改的栢芝觸怒向氏夫婦,將她踢出劇組永不錄用。

「愛發脾氣會比較」

一向低調的中國星老闆向華強昨首度挺身公開數臭藝人,他在上環公司接受本報專訪,直言《3D封神榜》飛走了栢芝:「呢個係噚日決定,呢啲通常係向太講,但佢好傷心,覺得冇面,因為佢一手一腳傾嘅,今次迫不得已換人,向太覺得冇面唔識講,𠵱家拍咗兩個幾月,投資幾億,換人都係大損失。」
向華強透露栢芝於六、七個月前與向太微信,兩人傾開家事,向太覺得栢芝獨自湊兩子十分吃力,故給予機會,栢芝自認以前工作態度不好,希望改過重新開始,向生數臭栢芝說:「一拍嘅時候,死性不改故態復萌,呢個係性格問題,佢有啲神經質,發脾氣留難製片,每次同場有其他巨星,栢芝覺得自己受忽視,就發脾氣,佢個心唔舒服會比較,坦白講,人人都比佢紅,但係佢戲份多,為呢啲扭計,故意刁難製片,失驚無神由新加坡返北京開工,但冇話畀劇組知,仲話大家唔畀定啲戲佢拍。估唔到佢到今時今日都咁,變本加厲,死性不改。」

相關新聞:哭求機會:六連仆博翻身

「反轉豬肚就係屎」

向華強坦言向太感到失望和傷心,問是否栢芝識富豪新歡後態度變?他說:「好多人都有有錢朋友,我唔覺得有關係,係個性問題,越嚟越嚴重。佢已經離開咗劇組,本來今日有佢戲份,但停拍,佢有搵經理人打畀我哋,講嘢好軟。」問如果栢芝道歉認低威,會否有彎轉?他決絕說:「唔會,我同向太死心,會畀人笑,有傳媒朋友同圈中朋友知道我哋搵栢芝,已經講叫我哋小心,但向太覺得可以處理到,同栢芝會改,栢芝開頭都OK,仲口口聲聲話會教向佐演戲。」
在電影圈打滾數十年的向華強說:「今時今日,我唔使再就邊個,我拍咗廿幾三十年戲,換佢咪換佢,損失咪損失,我仲安慰向太,叫佢撇脫啲,栢芝係計時炸彈,𠵱家咁好過ending扭計,如果要形容佢,我會用反轉豬肚就係屎,一定永不合作,幾紅嘅紅星我未見過咩?我唔希望受氣,佢冇得救!」問栢芝是否合作過最反骨演員?他說:「費事講呢啲字眼,大家心中有數,佢喺微信𠱁向太,向太精明都俾佢過一戙,係面子、judgement同俾人笑。」日前栢芝現身上海機場,當時仍未被飛的她見到粉絲,笑得相當開心。
採訪:文國駿、葉君海

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載