› 選擇地區
三藩市
紐約
洛杉磯
其他美國地區
香港 台灣 北美
 
2015年03月22日

有話兒:小孩舉手考千嬅 我有嘢問

「Hello,大家好,我哋今日請到校長做訪問。」為訪問揭開序幕的,竟是只有七歲的嘉嘉,她日前聯同《五個小孩的校長》其餘小演員,一同訪問戲中的校長楊千嬅,分享拍攝趣事。在「校長」眼中,五位小孩都是精英,口齒伶俐、記憶力強,更笑言新一代主持可以執包袱返屋企。
撰文:馮國康

嘉嘉
真名:傅舜盈 年齡:七歲

「校長,我哋邊個演得最好呀?」從嘉嘉說話時的語氣和自信,就知她為電影付出了很多。「其實,五個都真係做得好好,不過偶爾你哋會輪住心散,好彩休息完都投入到。其實你哋五個都好叻女,都拍得好快,好好記性。你又覺得自己做成點?」千嬅真賴皮,沒答問題之餘還反問對方。「好!」嘉嘉還是一臉自信,跟千嬅性格頗似。「正呀,童言無忌。咁又真係做得幾好。」
戲中嘉嘉飾演姜皓文和劉玉翠的女兒,戲份是五個小孩中最重。其中有兩幕催淚戲,包括在家中守護雙親,以及片末的畢業感言,都是嘉嘉的個人表演。現實中,由於嘉嘉較年長,順理成章扮演大家姐角色,尤當她們向古仔「爭寵」時,她便負責緩和氣氛。
嘉嘉表演慾旺盛,剛升上小學的她,又參加了拉丁舞興趣班,還即場當眾表演。千嬅笑說:「咁勁嘅,學咗幾個月就比賽!你知唔知邊個係Aaron哥哥(郭富城),佢跳舞好叻,叫佢帶你走埠啦!」

千嬅評價

令我印象最深刻就係嘉嘉。嘉嘉比較成熟啲,我同佢比較多對手戲,一啲感情戲比較長篇啲。我覺得佢好有才華同好有天份,因為好多對白,佢唔單止記晒,佢講對白時候,你feel到佢係明白自己講緊乜,同埋好投入。所以有時話大人要帶動小朋友入戲,但我發現咗呢個係互相帶動,因為佢嘅真實、佢嘅純真,嗰種真心係好觸動到我。

珠女
真名:王詩雅 年齡:五歲

珠女問千嬅IQ題:「跌咗身份證應該點做?」千嬅答:「報失囉!唔係應該點做呀,執番呀?」珠女甜笑:「係。」只得五歲的珠女,是五個小孩中年紀最細的一個,受訪當日說話不多,但永遠保持住最甜美笑容,閒時輕撥秀髮,閒時裝出楚楚可憐相,自然成為劇組最多人愛錫的一個,尤其是古天樂。「最鍾意邊個呀?東東哥哥吖嘛?好勁呀古天樂,三歲到八十歲都迷佢。你睇吓佢,迷晒成個人!」千嬅指着珠女,沒好氣的說。
珠女在戲中是一名孤女,與吳浣儀飾演的嫻姨相依為命。雙親在雷雨夜遇車禍慘死,故一直害怕「行雷怪獸」。其中一幕,講述她在雨中得悉雙親已死,要大哭一場,絕對是考驗。千嬅說:「對佢嚟講,其實有好多嘢係唔明。其中有場講行雷閃電,佢點解可以做到個畫面出嚟,我相信係幕後副導演帶領佢哋好耐,有感情,所以珠女對佢哋好信任。」千嬅續說:「所以一講話佢媽媽俾人捉走,跟住佢即刻喊!記唔記得嗰次你喊得好淒涼?係咪大師兄(副導演)整蠱你?」珠女害羞答:「唔係,係俾達哥哥(場務)捉咗!」千嬅說:「你跟住嬲咗達哥哥好耐喎,冇畀好日子佢過!」珠女又是不停儍笑。

千嬅評價

珠女講嘢好細聲、好斯文,但當開拍之前,畀佢同其他小朋友一齊玩,warm up咗之後,就可以做番珠女。

小雪
真名:何涴瀠 年齡:六歲

看過電影的讀者,都會被小雪的懂性所感動。她在戲中飾演一對中港家庭的女兒,母親和弟弟在內地居住,她則要照顧年邁的父親(吳耀漢飾),除了要推木頭車變賣銅鐵,又要在家洗衫煮飯。見她踩着鐵罐舉步維艱一幕,實在令人動容。千嬅問小雪:「有冇同你媽咪講你學踩住個罐度學咗幾耐?」「有。」「有冇跌親過?」「冇。」「咁叻呀,咁你可以玩跳水喎!」「因為綁住呀嘛。」
別以為現實的小雪沉默寡言,其實是「冇電」之故,在跟千嬅對談之前,她儼如開籠雀似的滿場飛,自言最愛《魔雪奇緣》Elsa的她,還當眾獻唱洗腦歌《Let It Go》,英文歌詞無一遺漏,且咬字精準無誤,令人驚喜。其間,她又問千嬅:「校長,如果我開演唱會,你會唔會做我嘉賓呀?」千嬅笑說:「會唔會好快就開?如果校長仲方便就一定會嚟做嘉賓。如果退咗休就嚟睇,同埋幫你聯絡其他人做嘉賓!」又乘機取笑古仔:「不如叫東東哥哥做嘉賓啦,佢好襟唱,又識跳舞!」

千嬅評價

小雪比較活潑,但係佢自己都好有性格,譬如佢真係好攰,真係冇電嘅時候,佢唔講就唔講,比較容易心散。但當佢知道其他小朋友都做緊同一件事,好有心機嘅時候,佢就會齊心番,因為要合作。

Kitty
真名:李詠珊 年齡:六歲
Jennie
真名:陳麗兒 年齡:五歲

巴基斯坦裔的Kitty和Jennie,戲份跟其他小孩一樣重,兩人不時鬥氣,活像一對歡喜冤家,合拍非常。不過,兩人其實並無血緣關係,就連千嬅起初也誤會了她們是親生姊妹。「所以佢哋好投入,當Kitty被人恐嚇,話你媽唔要你時,最高境界係,通常Jennie都會安慰佢。小朋友對環境好單純同直接,喺任何環境裏面都可以假戲真做,好多時候都係真眼淚、真感情,所以都俾佢哋感動到。」
訪問當日,Kitty和Jennie比較文靜,但其實是眾人的「Mr. Bean」,甚懂得在片場搗蛋搞氣氛。Kitty相當喜愛唱歌,首本名曲當然是滾瓜爛熟的《小太陽》,還膽粗粗的問千嬅:「校長,你可唔可以教我唱歌?」千嬅笑說:「冇問題,但你唱歌已經好叻喎。唱《小太陽》?你仲熟過我!教埋我個仔唱好嘛?」

千嬅評價

南亞裔嘅小朋友Kitty同Jennie,佢哋好容易投入,雖然大家之前唔認識,但經過排戲之後,真係做咗真實姊妹嗰種默契出嚟。雖然偶爾會心散,但都會互相幫助。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載