蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月12日
馬上成為壹會員

名門:沒星星的家 Alvin Goh

【客廳】
佔地1600呎的新居,Alvin以歷年作品表達gallery home主題。
攝影:陳順禎

新加坡造型師Alvin Goh(吳吉倫)扎根香港為棲息地,以古董家具及其個人作品為室內設計的主軌,當中為新居在各地搜羅設計師名椅作擺設重點。工作周旋於不少國際紅星潮人的他,在家中卻不會擺放與星星合作的作品,皆因要抽離休息才是靈感的原動力。
撰文:梁錦雯

來自新加坡的Alvin Goh由化妝師走到造型師,合作單位亦越是國際級A-list的藝人,如去年他便為日本天后濱崎步的日本巡迴演唱會設計多個造型。Alvin的工作視野雖越國際化,卻選擇了香港為移居地,近日新屋剛完成裝修工程,善於創作的他親自構思,在佔地一千六百呎的安樂窩,以gallery home的概念區分的室內設計。
白色為主體的家居,細分客廳、飯廳、休閒室、主人房、工作室等,擺滿了設計師名椅及以自己歷年的巨型化妝畫作、為個人作品展打造的工作枱等作佈置。

曼谷搵古董傢俬

Alvin的工作要不時飛世界各地,更令他加着重在家日子的舒適度:「我喺香港,鍾意留喺屋企,屋企對於我嚟講要好有安全感。」善於營造視效的Alvin,新居富空間感及cozy感覺,他表示:「我搬嚟時間屋係白色,覺得好空好白,有點寂寞感覺,所以我就構思以顏色、物料嚟spice up個家居。」Alvin透露近一年多了一個新興趣,迷上買傢俬:「我周圍去唔同地方買設計師椅、茶几,越買越有passion,呢一年已經買咗10幾張凳,最近先去完曼谷搵收藏家割愛,之後會親自押運返香港。雖然啲凳係各有風格,襯埋一齊又好和諧。如客廳好多木嘅元素,好似木書櫃、木電視櫃,掛鐘,我就會用有質感嘅織布梳化嚟襯番。」

在家要off duty

Alvin的家以古董家具與精選了他十多件、透過不同媒介、充滿contempoary風格的造型作品的融和,當中有與麥當娜髮型師與意大利《VOGUE》合作的攝影畫作、為化妝品牌做個人藝術展的雲石枱、一系列攝影視效的畫作、LED燈泡織成的corset裙等:「我嘅作品有beauty與時裝的元素,由於太大件,之前都係擺喺倉,或者送畀人,𠵱家就有地方擺出嚟。」眾多陳示作品中,Alvin並沒有揀中以他合作的明星作品:「因為喺屋企,已經係off duty,唔想再接觸到明星,想真正抽離同休息。」

步姐勤力Diva

Alvin的造型功力不容置疑,去年為日本天后濱崎步做了四十場巡迴音樂會的造型,2月時步姐去台北,他更陪伴去夜市掃街,而荷李活女星奧瑪花曼(Uma Thurman)、泰達史雲頓(Tilda Swinton)等都合作過。
Alvin的親和力絕對是成功關鍵,他笑言:「在每個演藝人身上學到佢哋成功態度,同濱崎步識咗一年,喺我心目中佢係一個Diva,一個好勤力嘅藝人,佢會親自覆你電郵,好多嘢佢自己親力親為,呢個係佢成功嘅原因。」Alvin難忘與奧瑪行女人街:「佢冇明星架子,嗰次我同佢行銅鑼灣女人街、佢講佢以前嘅男朋友嘅事。」來自新加坡的他與同鄉陳潔儀老友,他表示:「佢好有discipline,十幾年前已經同佢用家姐細佬相稱,佢好知自己做乜,冇人阻住佢,𠵱家年輕人冇呢方面,係佢身上學到做人態度。」

網購娜姐性書

在Alvin位於港島的新居,除他的作品外,他愛收集時裝、書籍、擺設的珍藏,如時裝品牌Versace的絲絨咕𠱸、招牌Medusa頭像巨型浮雕掛飾,甚至會找裁縫為他訂製過萬個扣針而成的西裝褸。在他的書櫃裏,當然有不少關於時裝、攝影名師的coffee table book,亦會從ebay動輒幾千元尋回珍品,如麥當娜初出道的《SEX》,Givenchy主帥Riccardo Tisci的《Visionaire 60-Religion》等時裝書、亦會買關於鳥類題材的書籍,甚至充滿童心未泯的貼紙書。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載