› 選擇地區
三藩市
紐約
洛杉磯
其他美國地區
香港 台灣 北美
 
2015年04月19日

我Q你答問會:人人問阿Sa
粗口勁定側手翻醒?

蔡卓妍(阿Sa)能否封影后還看今晚,大戰前本報請了16位市民向阿Sa發問,又有人問到阿Sa可否再做以往的側手翻絕技?而之前杜汶澤爆阿Sa講粗口流利過英文,究竟她怎樣還擊呢?還有粉絲問阿Sa的pizza面為甚麼失蹤了?最近迷上韓星的阿Sa,當被問到如果跌落水想被李敏鎬或T.O.P拯救?阿Sa竟然答:「我會揀死囉!」
採訪:余燕儀、魏嘉琳

Q1.王先生:上次阿澤話你講粗口流利過講英文,係咪㗎?

阿Sa:阿澤講嘅嘢都好信嘅,我就唔信嘞第一個。

Q2.梁先生:入行15年,有乜最難忘畫面?

阿Sa:呢條一定係你哋叫佢問,真係?咁官方問題,呢個fans嚟,入行15年有乜最難忘實在太多,好難得一兩樣,基本上成個過程都好難忘,但又好快,好多嘢好似噚日發生咁。

Q3.陳小姐:你仲打唔打到側手翻?

阿Sa:梗係打到啦,寶刀未老,要唔要𠵱家打個畀你睇。

Q4.文小姐:《雛妓》男主角唔係任達華,你會想係邊個?

阿Sa:《雛妓》男主角唔係任達華,根本開唔到呢套戲,諗唔到喎,冇啦,一定係華哥。

Q5.陳先生:英文名唔叫阿Sa,唔叫Charlene,會想叫乜名?

阿Sa:冇諗過喎,咁搞笑嘅,點解會問啲咁問題,答唔到嘅。

Q6.郭先生:你會唔會好似發哥咁,成日搭公共交通工具、的士呢?

阿Sa:我都有搭公共交通工具,不過唔係好多,好間唔中先搭到,第一因為好多時候唔喺香港,第二喺香港嘅時候好多時都喺屋企好少出街,同埋舊年考到車牌,所以會自己揸吓車咁囉。

Q7.張先生:士多啤梨、啤梨、蘋果、橙,最鍾意食邊樣?

阿Sa:哈哈,呢個問題好無聊,我最鍾意食橙,每日都要食一個橙。

Q8.動主播嘉琳:阿Sa,你如果跌咗落水,你想T.O.P定李敏鎬救你?

阿Sa(雙手掩面):諗唔到,嘩,呢個問題實在太難啦,首先呢,我係好叻游水,其實唔係好使佢哋救,如果真係要揀,我會揀死囉,畀我死咗去算啦,因為橫掂都係要死,一係早死一係遲死,我覺得就算佢救咗我上岸,都會畀佢啲fans打死,不如畀我死咗去算啦,哈哈!

Q9.文小姐:你鍾意陳偉霆啲咩?

阿Sa:呢條太八卦啦,唔答,關你乜嘢事,哈哈哈。

Q10.鄭小姐:會唔會喺鍾意嘅人面前放屁?

阿Sa:放屁好平常啫嘛,唔係喺鍾意嘅人面前先放得屁。

Q11.李小姐:如果Twins要加個成員,你覺得邊個適合?

阿Sa:Twins好難加新成員,Twins係雙胞胎,如果加新成員要改名,我哋好難喎,呢個冇諗法。

Q12.譚先生:如果可以幫阿嬌度身訂做一個角色,會係點樣嘅角色?

阿Sa:我覺得阿嬌除咗拍打片犀利,其實佢拍文藝片都好好睇,因為佢又靚啦,同埋佢個樣,有一種好安靜嘅靚嘅感覺,所以佢拍文藝片應該幾好睇,或者拍傳記啦,我都好想拍。

Q13.朱先生:Twins演唱會只可以請一個嘉賓,但唔可以係同公司嘅,你想請邊個?

阿Sa:淨係請一個,仲要唔同公司,嘩,好難諗㖭……吖,諗到,或者請S.H.E囉,因為大家都係組合,出道年份差唔多,去到今時今日大家仲喺呢個圈,我諗嗰個畫面會幾感動,如果兩隊組合喺台上唱歌,係囉,覺得好難得,又未試過一齊同台。

Q14.姚小姐:喺香港游水會唔會着三點式?

阿Sa:香港游水一定着三點式啦,不過𠵱家啲一件頭都幾靚,不過好少喺香港游水。

Q15.畢傑:阿Sa點解唔見咗塊pizza面?我好鍾意包包面㗎。

阿Sa:哈哈哈(笑彎了腰),好好笑,我其實仲有㗎,塊面仲有好多肉,不過冇以前咁大塊,收咗水啩,我唔知呀,但係有啲角色仲係好肥腫難分,好難搞,算啦,我接受咗,天生塊面係圓嘅。以前係芝心加厚批,𠵱家係薄批,哈哈哈,但係都係一塊pizza。

Q16.熊小姐(普通話):阿Sa,你那麼瘦,想問一下你一餐最多吃幾碗飯?

阿Sa(半鹹淡普通話):我以前小時候一餐吃三碗,然後現在可能一碗、兩碗吧!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載