› 選擇地區
三藩市
紐約
洛杉磯
其他美國地區
香港 台灣 北美
 
2015年04月23日

【add】
紅人主場:李嘉欣最佳女主角

人一出生就在飾演不同角色,由大美人變為凍齡美魔女的李嘉欣(Michele),14歲做模特兒入行到選美冠軍,今天她飾演人妻和母親兩個角色,嘉欣接受《add》訪問,坦言這兩個角色比她之前演過的任何一齣電影裏的角色都要難演,每天都在鑽研如何演得更好,雖然沒有預設的劇本和對白,縱使是最難演的角色,但相信也是她最愛演的角色,繼續演繹精采人生。
撰文:顏英儀
攝影:Simon C
化妝:Omix B
髮型:Nichol Yip of HAiR

2008年李嘉欣嫁給許晉亨做豪門媳婦,婚後過着令人羨慕的豪門少奶幸福生活,自從寶貝兒子許建彤(Jayden Max)出世之後,生活起了很大變化,現在全天候照顧現年4歲的Jayden,每天跟着他跑跑跳跳,花了不少精神和體力,嘉欣更笑言湊仔比拍戲更辛苦,她說:「每日都要同Jayden鬥智鬥力,小朋友有自己諗法,非常有好奇心,我都會鼓勵佢講出嚟,都有少少勞心,勞力就係每日陪佢奔奔跑跑,不過佢都算斯文,但有時都會搗蛋,叫佢做功課又未必合作,都會有少少激氣但開心都有好多,有時會整古做怪,唱下歌都會令我好開心。」

想生多一個

嘉欣覺得教子沒有一個特定的方程式,是由經驗慢慢揣摩,看到不少富二代都嬌生慣養,嘉欣表示不會太縱兒子,有時曳曳都會打他的小手板教訓,所以兒子沒有少爺仔脾氣,她說:「我唔會太縱Jayden,首先唔可以要風得風,唔會要求咩都畀佢,但有時都會鬆懈,所以時時刻刻都要提自己,始終身教好重要。」
44歲的嘉欣早前透露已將自己的卵子雪藏,是否意味會再生小孩?嘉欣說:「我都諗過若果生多一個小朋友應該會好開心,囝囝可以學習照顧弟妹,但生兒育女都要隨緣,睇下上天安排,𠵱家Jayden有表哥陪他玩,佢哋兩個就好似親兄弟一樣,所以目前嘅狀況已經好感恩,做人一定要惜福。」會等兒子長大後復出拍戲嗎?「平日再忙都會爭取時間做自己鍾意嘅事,好似睇戲同做運動,但相比拍戲,現階段我會專心鑽研自己做『太太』同『母親』呢兩個角色,呢兩個角色比我以往演過任何一戲更難演!」

【港媽唔易做】

相信全香港的媽媽都會同意「港媽唔易做」這一句說話,為了爭取入名校,父母都會為子女報讀不同興趣班,李嘉欣亦要為兒子功課做資料搜集,更坦言做「港媽」有壓力,但不會做怪獸家長,「𠵱家資訊太過發達,有時都會喺家長嘅forum同其他父母share意見,我知道好多媽咪都為仔女報唔同嘅興趣班,我會盡量保持中立,人哋做我未必會做,一定要啱Jayden先會畀佢學。」

【丈夫窩心幫忙照顧Jayden】

李嘉欣每日照顧兒子Jayden,丈夫許晉亨就相當貼心,經常製造機會讓太太唞唞氣:「𠵱家有八成時間照顧家庭,剩低只有兩成時間留畀自己,囝囝出世後成為家庭重心,以前我鍾意凌晨3、4點先瞓,𠵱家就會早啲瞓,朝早起身送囝囝返學,同佢傾下偈,我老公都好尊重我嘅工作,我主要係做代言、拍廣告同做慈善,大家一齊配合時間照顧Jayden,無分你我。即使再忙碌,我地都會堅持自己嘅嗜好,都會有時間過二人世界,老公有時都會好窩心,主動陪囝囝出街等我好好休息一下,做自己鍾意做嘅事,其實除左Jayden之外,老公加埋自己就係一個家庭一個整體,同樣重要。」

【凍齡美魔女是如何煉成?】

李嘉欣選港姐後一直被稱為大美人,44歲已升級為凍齡美魔女,雖然歲月催人老,可是歲月並沒有留下太多痕迹於嘉欣的臉上,早前嘉欣於微博上載了與丈夫出外吃飯的照片,網民就指嘉欣魚尾紋乍現,相信沒有魚尾紋才怪吧!嘉欣keep得好,內外都散發着自信光采,凍齡美魔女究竟是如何煉成?「我覺得美麗並非止於外表,而是由內而外散發出嚟嘅氣質,平日除咗護膚之外,仲要多飲水,每日我都會做伸展同排汗嘅帶氧運動,排毒之餘又可以釋放正能量,心情同皮膚都會變好,抱住開朗積極面對人生,開心自然會變得更靚。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載