› 選擇地區
三藩市
紐約
洛杉磯
其他美國地區
香港 台灣 北美
 
2015年04月26日

我主場:陳詩慧貼錢追夢

陳詩慧坦言做娛樂圈要靠運數。
攝影:沈健程
場地:津八見
化妝:J.Wong of Hello J
髮型:Cliff Lam of Beijing Hair Culture

機會是留給有準備的人,早前憑港視劇《選戰》插曲《I'll be there》彈出的唱作人陳詩慧,屈指入行12年,過去曾為陳奕迅和張敬軒打造過hit歌,她丁點人氣都黐不到,陳詩慧明白時機未到。慶幸家人倒貼六位數字讓她發音樂夢,她語重心長勉勵新人:「呢行係要帶錢嚟打工。」
撰文:比華利

唱作歌手陳詩慧早前憑港視開台劇《選戰》插曲《I'll be there》,令歌唱事業得以谷底反彈,這首歌更一度登上iTunes榜的冠軍,天時地利人和。港視擾攘多時仍未獲發牌,但揸弗人「魔童」王維基永不放棄,前日在高等法院上訴得直,令行會再審議發牌申請,無奈港視很多藝人早前已為生計前途先行離場,陳詩慧是其一,她早前獲蕭定一力邀過檔,為她打造新一頁的歌唱事業。

轟一男子剝削努力

陳詩慧在圈中浮沉多年,完全明白遊戲規則:「港視一日唔發牌,大家都唔會睇到前面嘅路,係冇乜嘢生存空間,啲豬肉又唔夠分,唔係自己想放棄,係要被迫放棄。」陳詩慧慶幸家人營商,未有家庭負擔,相對還獲得家人「倒貼」:「貼咗我最少六位數字,我好想講,要養家真係唔好入行,呢行係要帶錢嚟打工。」
陳詩慧獲家人經濟支持追夢,但發夢都必要有醒覺一刻,她給自己定了「死線」:「以前出道都叫有啲曝光、有啲聲氣,近年我真係零出鏡機會,訪問都唔發巿,我有動搖放棄。有一段時間,我冇工開,就幫屋企做物業管理。」陳詩慧回想隨媽咪北上開工,她叫苦連天:「嗰段日子好痛苦,我心理好唔平衡,越諗自己花咗咁多年喺呢行,全因一男子因素,剝削咗我一直嘅努力。」

黑暗日子欠安全感

過去日子陳詩慧紅歌唔紅人,總是為別人打造嫁衣裳,她曾為陳奕迅歌曲《演唱會》填詞,她說:「同佢哋一齊,真係黐唔到啲乜嘢,我明白運未到,想黐都黐唔到,係個天唔畀你,即使十倍努力都係冇用。」今年陳詩慧時辰到,獲幸運之神眷顧的她說:「我𠵱家算有大運,守得雲開。」不過陳詩慧被困黑暗日子太長,令她沒有安全感:「我打個比喻,餓咗十年,平日都係靠食吓餅乾碎維生,餓過飢,你突然醒塊牛扒畀我,食都唔知乜嘢味。情況就係咁。𠵱家我已達無求境界,人無欲就可以豁出去,全心一意做好音樂。」

【靈感邊度搵】開枱搵靈感

入行12年的陳詩慧,於2008年正式出道做歌手,曾為陳奕迅的《閃》和《演唱會》填詞,而張敬軒的《隱形人》以及鄭欣宜的《無人完美》亦是她的作品,打造過唔少hit歌的陳詩慧自爆靈感源頭:「麻雀枱呀,我打打吓麻雀就會有靈感。」當同枱的三位雀友見到她突然動作放緩變「站長」,即意味她「嚟料」,她笑言絕對是攞正牌奉旨開枱。
平日關心時事的陳詩慧,可會打算作首港人心聲?她說:「我寫歌範圍其實好廣,乜嘢題材想寫,可以係情歌或者勵志歌,我覺得港人好需要正能量,所以我寫嘅歌會盡量帶出多包容、多啲愛嘅訊息,希望大家聽完都做得到。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載