蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月29日

《大時代》引爆積怨
青雲媾劉美娟 輸畀邵仲衡

大台重播23年前神劇《大時代》引起全城熱話,劇中演員全部翻hit成焦點。昨日有雜誌翻邵仲衡舊賬,指他當年與郭藹明曾經拍拖,兼被劉青雲撬牆腳一事。不過,本報得悉劉青雲當年確向邵仲衡女友展開熱烈追求,惟那人並非郭藹明,亦非曾跟邵仲衡拍拖的邱淑貞,而是85年參加健美小姐入行、01年與張崇德結婚的劉美娟,邵仲衡亦向本報親證:「個女仔唔係郭藹明!」

相關新聞:經典背後:《大時代》的瓜葛

現年51歲的邵仲衡,當年是大台力捧小生,在《大時代》演丁蟹大仔丁孝蟹亦十分搶鏡。不過,邵仲衡於95年決定離開無綫,其間都有拍外埠劇,但01年與圈外太太Wendy結婚後便消失幕前,轉戰商界經營越野車店,去年才復出參與拍攝港台劇及客串電影《點對點》演出,未料重返娛樂圈即有新聞,指他與郭藹明有一段情,並被劉青雲撬牆腳。

「對方180度轉變」

邵仲衡昨日接受本報電話訪問,問他是否曾被劉青雲撬走郭藹明?邵仲衡笑說:「真係要澄清!我冇同郭藹明拍過拖,我只係話當年同某位男演員拍劇,本來同對方好好傾,有一日對方態度突然180度轉變,又成日窒我,收工同女朋友呻,先知道嗰個男演員,原來成日喺我女朋友屋企樓下等,我就明晒係乜嘢事,但個女仔唔係郭藹明!個男演員影響唔到我同女朋友關係,我哋拍咗10年拖先分手。」
邵仲衡於90年曾與劉青雲合作拍劇集《燃燒歲月》,當時他的女友正是有翻版翁美玲之稱的劉美娟,而娟妹因為跟劉青雲同期出道,兩人曾多次合作拍劇,包括85年出道即拍的劇集《銀色旅途》及86年的《赤腳紳士》等。
問邵仲衡當年迷倒劉青雲的女友是否劉美娟?他說:「邊個唔講喇!𠵱家各自都有家庭,其實都係陳年舊事,對我嚟講係得啖笑,係當年嘅生活逸事。」可會抗拒跟劉青雲合作?邵仲衡語帶輕鬆說:「唔會!呢行冇啱與唔啱,以前大家都係𡃁仔,𠵱家只當茶餘飯後話題。」
當年邵仲衡與邱淑貞相戀雖是公開秘密,但正式公開戀情只有劉美娟,兩人由90年拍拖至00年分手後一年更各自建立家庭,邵仲衡娶了圈外太太Wendy;劉美娟則與同是基督徒的張崇德結婚。

巧與對方老婆拍劇

邵仲衡其後續笑謂:「都幾好笑㗎!之後我拍一個40集劇,咁啱就係同嗰個男演員當時女友,𠵱家已經係老婆嘅女演員合作演夫婦,嗰時我好避忌呀!除咗開工講對白,成個劇同個女仔都講唔夠10句嘢!」由於93年邵仲衡曾與郭藹明在劇集《天倫》飾演夫婦,故當年撬娟妹的人是劉青雲,幾乎呼之欲出。
採訪:小米

錯綜複雜:撬牆腳關係圖

年屆51歲的邵仲衡與劉青雲,現時同樣擁有一段美好婚姻,但原來他們曾同一時間喜歡女子。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載