蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年05月09日
馬上成為壹會員

【狂煲大時代】《大時代》小角色

大台近排在深宵重播《大時代》引起全城熱話,劇中演員再度成為談論焦點。

我們當然知道,無綫劇集《大時代》雲集眾多好戲之人,但最厲害還是連小角色都有發揮空間,更孕育出無數潛質演員,如林家棟、黃德斌、黃一飛、郭少芸等,當年都只是過鏡角色,23年後的今日,他們都能獨當一面。
撰文:蘇芬妮

梁健平

出場集數:25
飾演:林律師
憑《三輪車伕》捱出頭的綠葉王梁健平,在《大時代》扮演林律師,3年來未輸過官司,不想因為替不合作的丁蟹辯護而「破處」。梁健平說:「印象唔係太深刻,因為嗰排演好多律師角色,有時都會有特定人選。但最遺憾係冇留低韋家輝嗰個劇本,嗰時𡃁仔唔識貨,冇諗過韋家輝原來會離開無綫。佢喺我心目中真係一個神級編劇,寫稿係滴水不漏,好出色。」

黃德斌

出場集數:33
飾演:股市交易員
「丁生,開市啦!」當年黃德斌出場時的第一句對白,畫面幾乎看不到他的樣貌,今日已是無綫小生。德斌憶述說:「嗰時啱啱訓練班出嚟,細節都唔記得清楚,嗰陣一日四組戲,四個不同劇喎,仲做緊甲乙丙丁,用唔用心演唔係自己講,大家睇。但講真嗰時邊容許你用心演呀,後面啲角色,叫你行行……行啦,行啲啲,雖然我有熟讀劇本,但去到現場最後原來冇對白嘅,冇理由點支火柴搶戲㗎,哈哈哈。」

林家棟

出場集數:33
飾演:股市交易員
丁蟹團隊,結局一集因股市狂升,被丁蟹狂鬧至手忙腳亂。家棟笑說:「嘩!我淨係記得嗰場戲連續拍咗幾日,仲有公司啲經理、高層落晒嚟睇拍嘢,連去廁所都要申請,一定要拍完交易所嘅戲。因為外景隊嗰陣等緊丁蟹一家出去拍跳樓嗰場,所以氣氛超緊張!」

游飈

出場集數:5 飾演:報紙仔
出場集數:34 飾演:大炒友
出場集數:34 飾演:股市交易員
首次出場飾報紙仔,叼着口煙的游飈還教方進新叠報紙。後來又扮炒股專家和保險經紀,是全劇分飾最多角色的演員。游飈說:「成套戲唔止我一個有幾個角色,因為成日都唔夠演員。我第5集叠報紙,聯交所喺尾段所以唔怕囉。當時我演緊股市交易員,聽導演講上面爭個人企,我後生仔有heart嘛,咪話『等我換件西裝上去啦』,導演問『吓,得唔得㗎?』我話『得』,咪即刻入服裝間攞件衫上去。」

河國榮

出場集數:22
飾演:關Sir
河國榮貴為當年TVB御用老外,在《大時代》當然飾演高級警察的他負責處理丁蟹的謀殺案。但他已忘記當中角色,他說:「演乜嘢角色都唔記得,更加唔記得有冇錄聲同滔滔講電話。𠵱家冇追《大時代》。」

郭少芸

出場集數:25
飾演:聖姑
當年郭少芸剛剛參加完香港小姐競選,獲安排客串飾演聖姑一角,雖然出場次數不多,但她認為龍紀文(郭藹明)是煞星,訓示濟哥(劉江)不要幫助對方。郭少芸後來在《大鬧廣昌隆》飾古美英一角彈出。

林韋辰

出場集數:15
飾演:滔滔下屬
滔滔下屬,一副年輕才俊打扮,在滔滔與陳萬賢狙擊大戰前,因擔心慘敗而棄船,離場時有一句對白:「滔滔,take care。」林韋辰憶述說:「嗰時睇人做戲好正,尤其秋官同青雲好投入,收工都唔走喺度睇。」

麥皓為

出場集數:5
飾演:報紙檔老闆
麥皓為惡形惡相,食飯時戙高隻腳露出「白飯魚」,渾身散發草根佬味。多得這刻薄老闆,才令方進新跪求他不要炒魷一幕更煽情。82年加入無綫的麥皓為,因外形詼諧,曾在《笑聲救地球》發放笑彈。

廖麗麗

出場集數:26
飾演:法官大人
負責審理丁蟹謀殺方進新一案,曾三番四次提點丁蟹不要自辯,後來又向陪審團重申案件重點在於丁蟹有沒有殺人。廖麗麗是無綫綠葉,至今仍有拍劇。

黃一飛

出場集數:6
飾演:電器師傅
跟方展博學修理電器,並自修風水術數。幫慳妹整電視機,意外算出方家間屋風水極差,跟展博瞓天橋底,又批那裏「車如流水馬如龍,兩條財氣在當中」。

麥子雲

出場集數:17
飾演:濟哥頭馬
在濟哥身邊出出入入的一號打手,多次出手幫助龍紀文。麥子雲乃無綫綠葉王,慣演大賊、小混混角色。

大砲權

出場集數:6 飾演:生果店老闆
出場集數:10 飾演:囚犯
在星爺電影《新精武門1991》飾演吹蕭萍老公的「大砲權」,在《大時代》分飾兩角,巧合地都與橙有關——先是賣橙,後在台灣監獄拎橙。

紀保羅

出場集數:3
飾演:賀新
影射何鴻燊的角色,因為得到方進新的協助,成功投得澳門賭業權。紀保羅比河國榮更早出道,同樣是TVB御用老外。

郭德信

出場集數:1
飾演:韋家誠
影射李家誠的角色,最終在股票市場狂掃貨,協助方展博擊敗丁蟹。郭德信是無綫綠葉,擅長飾演正氣老闆、社會名流等角色。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載