› 選擇地區
三藩市
紐約
洛杉磯
其他美國地區
香港 台灣 北美
 
2015年05月17日

我主場:凍齡海味 挑機封胸霸權

已將工作重心轉往內地,定居北京12年的周海媚(海味),外表柔弱沒有殺傷力,是80年代無數男士的愛美神。不過,海味在耗資三億元製作的內地劇《武則天》忽然突破玩谷胸,「爆乳」連場令人看得熱血沸騰。可惜逼爆上圍最終慘被封胸,難得48歲的海味依然保持嫩肌兼白滑,成功吸睛;更被網民賜予「凍齡女神」美譽,演技亦贏盡掌聲。
撰文:鄉奈仁

周海媚85年參選港姐後晉身娛樂圈,現年48歲的她被讚「凍齡」不老,在內地劇《武則天》跟33歲范冰冰及28歲張馨予等女星爭妍鬥艷,谷胸爆乳鬥性感亦毫不遜色。可惜除了內地要播只剩膊頭以上的「大頭娃娃版」,香港亦只能播乳溝盡失的「banner封胸版」。海味日前接受本報專訪時說:「我冇睇香港版,但我知道係封咗胸,其實我都唔明點解接受唔到,呢個係歷史,好多朋友都同我講想睇有胸版本,啲衫好靚。不過冇辦法,好似呢個係內地賣埠嘅準則。」

獲網民激讚演技

《武則天》由上月底開始,於黃金時段播足七晚,有指一台獨大,觀眾「硬食」冇得揀,問海味點睇?她說:「或者可以好似內地咁,受歡迎嘅劇一個星期播三日,每次播兩集,我覺得咁樣都幾好,觀眾可以多啲選擇,劇迷又唔使七日坐定定冇得出街。」
多年來,海味常演斯文溫柔的角色,今次演繹心機算盡的楊淑妃,網民激讚演技贏盡眾女,包括有份投資兼演女主角的范冰冰,海味即時雙手合十謙稱:「係感情分箒!個個演員都好好,冰冰個角色好多變化,好好睇。不過,劇本真係冇描述楊淑妃嘅性格,係我自己用自己方法去演,都幾大挑戰。」

開設工作室圓夢

今年是海味入行30周年,為慶祝這個滿載回憶的數字,海味不惜豪花七位數字推出非賣品EP,又專程到韓國拍MV,不過最大的計劃莫過於她今年圓夢開設工作室,海味說:「工作室會投資電影、電視劇,但𠵱家好多嘢都係初步,我仲有經理人合約,將來都會同𠵱家經理人傾合作,工作室冇可能一個人做得晒,會同唔同人合作。」
做足30年,問海味何不享受生活,給自己多點時間拍拖?她笑謂:「開工作室就係享受生活,我好鍾意做幕後,有時會攞啲劇本自己改對白,對呢方面好有興趣。雖然鍾意做幕後,但我一定唔會放棄幕前工作。」海味又自爆性格男仔頭,永遠坐唔定,她笑說:「我個樣呃人㗎咋!其實我好男仔頭,細個成日打交,𠵱家都坐唔定,同埋鍾意試新嘢,越係唔識就越想試。」
「當年啱啱去北京拍劇,普通話唔得,我就逐個字問導演點讀,問到佢都唔想答,叫我講番廣東話,反正都會再配音,但我死都唔肯,因為唔講就一世唔識,同埋我覺得做演員要有誠意,亦要尊重對手,因為自己講廣東話,人哋聽唔明投入唔到,就係我嘅問題。」
場地提供:LALA CURIO

作品表:演活女鬼小芙蓉

周海媚近日憑內地劇《武則天》熱爆,海味入行30年,經典作品無數,其中《大鬧廣昌隆》的女鬼小芙蓉更深入民心,其間曾過檔亞視,而近年則專注於內地賺人仔。

劇集

1985年:《楊家將》
1986年:《流氓大亨》、《赤腳紳士》
1987年:《杜心五》
1989年:《義不容情》
1990年:《回到未嫁時》

1991年:《今生無悔》

1994年:《倚天屠龍記》(台灣)

1995年:《情濃大地》

1997年:《大鬧廣昌隆》

1998年:《天地豪情》、《縱橫四海》(亞視)
2000年:《影城大亨》(亞視)
2001年:《縱橫天下》(亞視)
2008年:《射鵰英雄傳》(內地)
2009年:《學警狙擊》
2013年:《神鎗狙擊》
2015年:《武則天》(內地)

電影

1988年:《法內情》
1993年:《逃學威龍3之龍過雞年》
1996年:《飛虎》
1997年:《求戀期》
1998年:《不夜城》、《野獸刑警》

2010年:《楊門女將之軍令如山》

2013年:《四大名捕II》

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載