› 選擇地區
三藩市
紐約
洛杉磯
其他美國地區
香港 台灣 北美
 
2015年05月17日

男友疑偷食 冷戰一個月
朱慧敏延婚期眼濕濕

朱慧敏(Queenie)與前EO2成員彭懷安(Eddie)拍拖3年幾,今年2月宣佈結婚,但Eddie多次被影到背住女友跟其他女仔玩得好親密,日前再斷正被影到與長腿索女宿一宵,今次似乎玩出火。前晚Queenie與黎諾懿在西環拍攝《愛.回家》時,透露兩人處於冷靜期,並會將婚事延期。

「唔係第一次發生」

晚上近10時,Queenie甫抵埗即被傳媒包圍,有工作人員與記者起衝突,Queenie幫助解圍。被問心情?她眼濕濕謂:「其實呢件事(Eddie疑偷食)唔係第一次發生,我想交番畀男方面對傳媒。」接着她埋位開工,表現專業,趁休息空檔再接受訪問。被追問延期結婚?她說:「一定會㗎喇!原本打算年頭,我個人希望延遲。」有否一刻想過不結婚?她猶豫一會說:「𠵱家我答你唔到。」
Eddie前晚認衰,在微博寫公開致歉信,但Queenie似乎未「收貨」,認為Eddie要企出嚟面對傳媒,而非逃避。是否感失望?她點點頭,直言為報道徹夜未眠,並透露兩人已有一個月沒有聯絡,但強調不涉及第三者。是否需要時間冷靜?她說:「我絕對要。」不過,Queenie仍讚Eddie是心地善良的好人,選擇繼續相信謂:「佢有同我講話係應酬,但冇講細節,我畀好大自由度佢。我相信人本性善良,有迷失時候,當下有冇做正確判斷?我好信證據,除非有更激嘅相睇到先會信;但中國人社會,身體上接觸都要小心啲囉。」
Eddie昨日被傳媒追訪,眼濕濕兼口震震地承諾會檢點:「我一心諗住娶佢,都會如期進行。」他透露長腿索女在卡拉OK認識,只是送對方返屋企,他說:「所有女士真係唔好搵我送返屋企,唔想有不必要誤會,要公眾擔心。」
採訪、攝影:梁繼光、吳耀輝

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載