› 選擇地區
三藩市
紐約
洛杉磯
其他美國地區
香港 台灣 北美
 
2015年05月30日

《大時代》造星傳奇

【狂煲大時代】《大時代》方家三姊妹前晚慘死,玲姐藍潔瑛變癲,下星期則踏入最後10集,高潮迭起。《大時代》不但見證時代變遷,也是當日一班配角成長印記。當年林保怡還是個演戲初哥,跟前輩江毅做對手戲未埋身已手震,結果10多年後他摘下香港及亞洲視帝,成為公認的好戲之人。而當日總是站在一旁羨慕劉青雲擔正神劇主角的陶大宇,3年後已火速榮升師奶殺手;《大時代》展現的不只是大奇蹟,亦是一個個演員的奮鬥歷程。
撰文:戴彩煥

相關新聞:陶大宇羨慕青雲演方展博

【林保怡收工留低學做戲】

憑04年《金枝慾孽》及10年《掌上明珠》成為香港視帝及亞洲視帝的林保怡,在《大時代》中飾演陳萬賢(江毅飾)的私生子陳滔滔,23年前接拍《大時代》時,還是個20來歲的年輕小伙子,演戲資歷僅得2年,幾乎是張白紙,要跟鄭少秋、江毅一眾實力前輩合作,保怡自然要打醒精神。保怡說: 「一睇劇本,好多台詞喎!嘩同江毅叔呀?直情有啲手震,唔得,我要做好功課,我要睇熟啲劇本先。」

「鍾意《天與地》多啲」

念對白對當年保怡來說是個負荷,一個鏡頭往往要拍多次才成功。保怡說:「有場同江毅老師對戲對得好勁,我take兩個take,江毅老師就會話:『等等,我出去休息吓先。』因為佢啲戲好用力,拍一兩場好似打場波咁,要出去休息吓。」
拍完收工是常識吧,但保怡偏偏喜歡繼續留低偷師:「喺鏡頭後邊睇人點擺機位,演員點演,對自己有幫助,袋錢落袋,有機會多留喺拍戲現場,睇其他演員演出,唔單止免費,仲係live,何樂而不為?當年我有睇青雲、藍潔瑛,秋官佢哋做戲,當然係縮埋一邊唔敢騷擾佢哋啦。」今日翻看自己演出感覺如何?保怡笑說:「可能有朋友睇到覺得演技好嫩,但我當時已經盡咗力,我冇後悔,當然𠵱家睇番,有好多嘢要改。」
《大時代》跟保怡擔正的《天與地》同被網民封為神劇,兩部神劇,那一部最「神」?保怡笑說:「兩個劇種都唔同!我鍾意《天與地》多啲,由《大時代》到《天與地》,我已經攞到好多經驗。其實兩個劇嘅劇本都好好,我亦好開心可以拍到《大時代》呢部咁出色嘅神劇。」
場地:Harlan's(The ONE)

【楊羚獲提點磨練演技】

已故前輩藝人劉克宣外孫女楊羚,在《大時代》飾演方敏,戲份雖然不多,但自殺不遂入院及跳樓前笑別家人等片段,令觀眾留下深刻印象。無綫近年愛在劇集中加插女藝人被姦場口吸睛,但楊羚在《大時代》被陶大宇強姦,只是對白交代也一樣可以震撼人心,楊羚說:「當年完全冇嗰啲鏡頭,唔似𠵱家撕爛衫嗰啲。我覺得始終係小朋友睇電視時間,鏡頭唔好拍得咁明顯,營造氣氛就足夠,唔使咁露骨!」
楊羚當年演戲經驗不足,多得藍潔瑛和劉青雲不時提點:「青雲仲送過本研究演戲嘅書畀我。當年我會嘻嘻哈哈走嚟走去,佢哋會拉我返入廠叫我培養情緒。」
撰文:戴彩煥

【艾威約玲姐益蟹打牌】

艾威飾演癡戀「玲姐」藍潔瑛的警察李立光,他說:「光Sir梗係鍾意玲姐,我拍戲通常唔吝嗇我嘅感情,尤其玲姐當時咁靚,鍾意佢一啲都唔難。我同佢唔需要有火花,因為我係單向暗戀,我serve佢都可以畀面色我睇㗎。嗰時會約埋佢同陶大宇嚟我屋企打麻雀,都有畀面色我睇……當我扣住佢啲牌嗰陣,哈哈。」
「我仲記得拍攝時曾經問過青雲:『你𠵱家到底係方展博定劉青雲?』佢話:『我可唔可以唔答你呢個問題。』我諗係因為演戲有時係一種出賣,出賣感情同出賣關係,要喺拍攝期間將自己同身邊人關係打破晒,然後再重新建立過。」
撰文:嵐山

【唐寧靠丁蟹帶入戲】

唐寧當年只是10歲,卻有幸被選中在《大時代》飾演童年版方芳,仍然是充滿童真稚氣的她,遇到戲外的鄭少秋和《大時代》的丁蟹,唐寧覺得好神奇,她說:「拍嗰時冇留意佢真係咁癲,𠵱家睇番佢個角色真係幾慘,長期處於好唔穩定嘅狀態。不過,秋官戲外同松哥一樣咁好人,成日同我哋玩,一開工就好開心,丁蟹就更加明顯,一入到戲就係兩個人咁,話惡就惡,驚咗佢?喺戲入面就驚,一cut機佢就變第二個人,所以小朋友好容易被丁蟹帶動做得好自然。」
撰文:楊潔雯

【黃寶龍難忘方家搬屋】

《大時代》做童年方展博的黃寶龍已經長大成人,今年34歲,未婚卻育有一個16歲的兒子,為家人打理書局生意,日前他接受訪問時說:「最記得當日玲姐要我哋搬走,我又要搬單車又要搬玩具,嗰幕真係好深刻。有幕係玲姐逼我返去師傅度,嗰時落住大雨,仲要同玲姐拉拉扯扯,我仲記得嗰晚已經凌晨兩、三點,好記得條後巷好污糟,我又濕晒。」
撰文:盧妹

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載