› 選擇地區
三藩市
紐約
洛杉磯
其他美國地區
香港 台灣 北美
 
2015年05月31日

有話兒:有種文青叫林雪

林雪夢想做文藝片男主角,情到濃時可與女主角床戰。攝影:陳慧安

半百林雪走過廿多年的電影路,飽經風霜,由場務到老臨,再登上最佳男配角,他都緊守崗位,發揮綠葉作用。林雪熱愛電影甚於幸福家庭,永不言休的他希望繼續追夢,有朝一天可當上大銀幕文藝片男主角,不再做小人物,要跟索爆女主角發生一段轟烈愛情。
撰文:比華利

有時在一齣電影中,「綠葉」的搶鏡程度不遜於主角,現年50歲的林雪從影超過20年,不過受外形局限,主角輪不到他,林雪認命,默默耕耘,即使被派演綠葉角色,他都做足一百分:「我每次擺自己個位都唔係綠葉嘛,當正係主角,咁嗰場戲焦點真係喺我度,係咁投入去做會發揮得更好。」

相關新聞:忙碌老竇唔合格

恨做愛情片男主角

不得不讚,林雪每次都把角色演得維肖維妙,尤其演活小人物神髓,他說:「平時多啲走入社群,多啲留意身邊事物,電影係嚟自生活點滴,我本身都係一個小人物,抱住呢啲心態就做得到。」林雪分享揣摩角色貼士,但他認為努力同時天賦都不可缺:「我諗自己係有啲天份,我好彩入咗呢行,唔係都唔知撈乜嘢,唔知點算,呢行算係偏門,睇天食飯,必然要天時地利人和。」林雪想當年得到友人介紹在片場當場務,機緣巧合下做了茄哩啡,讓潛在演戲細胞得以爆發。
熱愛電影的林雪心中暗藏一個電影夢,他沉醉說:「我好想有機會拍一套偉大嘅愛情片,我做戲中男主角,至於女主角未有話邊個人選,索就OK,情人眼裏出西施。」到底怎樣賣偉大?林雪說:「愛情係冇代價,完全付出,男主角係頂天立地男人。」基於商業理由,電影會有激烈床戰嗎?他答:「爭取靈魂上嘅快感,做到就領悟到,好文藝,不過,床戲呢啲嘢,順其自然,要上床就上床。」林雪恨做文藝片男主角,他說:「作為演員,乜嘢角色我都想試,未試過唔夠完美。我希望我嘅電影夢一直唔醒,有機會成為有深度演員,有一部孭飛嘅電影,唔係只限於一場、半場戲,我可以做到對角色有操控權,呢個係我嘅目標。」
演員工作不但給林雪滿足感,當然最重要是日日有飯開,他感恩:「我做演員,三餐唔憂,睇我身形就知,三餐係冇要求,求其放入口填飽肚,我對生活要求好低,但對電影工作就希望可以更上一層樓,每日都想有進步空間。」為電影事業,林雪可以去得好盡,他連家庭都只是排第二位,事業永遠都排第一。
從影至今,林雪雖獲多次提名,但只憑04年電影《PTU》摘過第九屆香港電影金紫荊獎最佳男配角,與金像獎無緣,他說:「攞獎係緣份,今年大會邀請我做過頒獎嘉賓,我都好滿足,上台講嘢足足有兩分鐘,開心過攞獎。不過,攞獎係一個肯定,又有邊個唔想。金像獎好有人情味,我唔介意70歲先拎最佳男配角。」

懷念當年好pure

問到林雪最喜歡過往作品中哪個角色?他表示是99年由杜琪峯執導的電影《再見阿郎》中演澳門司警「胖九」,戲中交代他與江湖大佬劉青雲結怨,林雪趁機公報私仇,勢要釘死對方:「我𠵱家睇番呢部戲仲好鍾意,嗰個惡司警好主觀,一味要做死青雲,針對佢。呢部戲令我開始畀觀眾認識,有咗知名度。睇番當年我嘅演技好乾淨、好pure、冇造作,唔識利用技巧幫自己走位,一句講晒好X。」現在累積了經驗,爐火純清,但林雪反而懷念當年:「𠵱家再演,做唔番嗰種感覺,有時識啲唔識啲都係好,一諗多咗就有問題。」
林雪演戲開竅,他不忘感謝兩位恩師,劉鎮偉當年一句點化:「佢話十八般武藝,與其學識就為咗殺人,不如練好一招。」另一位伯樂杜琪峯也教路:「佢叫我唔好將一件事擺晒塊面度,放喺心,千祈唔好用肌肉做戲。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載