› 選擇地區
三藩市
紐約
洛杉磯
其他美國地區
香港 台灣 北美
 
2015年06月10日

我Q你答問會:全智賢 VS 老婆阿徐
Eason只能揀一個

連續一星期刊登的《我Q你答問會》,第二彈輪到「吹神」陳奕迅(Eason)嚟玩啦!日前Eason到將軍澳蘋果大樓坐定定,喝着咖啡睇16位在銅鑼灣行街的讀者的提問,連揀A餐定B餐的有趣問題,他都無條件地爽快答大家。有讀者問Eason閉起雙眼會掛念誰?他的答案竟然不是「老婆徐濠縈」而是另一位女藝人的名字,完全不怕被老婆扭耳仔。
採訪:皓騫、魏嘉琳

相關新聞:我Q你答問會:人人問Eason閉起雙眼你最掛念誰?

1.呂同學:我想問你《大時代》裏面想做邊個角色呢?

Eason:呢個學生講嘢好快,同埋笑容好靚。都係丁蟹啦,我未試過揼人落街,連續揼4個,嗰種狀態已經失去理智,好狠!

2.彭同學:幾耐去一次炳記(茶檔)?點解撞極都撞唔到你?

Eason:呢位男同學有啲嗲,我其實朝早去炳記多啲,佢6、7點開門,可能你返咗學啦,炳記都正。

3.劉同學:你早餐會食A餐多定B餐多?

Eason:(大笑)乜嘢料?我冇理A、B喎真係,我就咁指住個牌,通常食五香肉丁公仔麵、腸蛋,唔知A、B乜嘢餐。

4.顏小姐:你老婆靚啲定全智賢靚啲呀?

Eason:嘩!(諗咗30秒)好難答喎呢題,各有各靚啦,我同我老婆熟啲,對一個人有感情,梗係唔同啲,問得幾好喎呢題。

5.黃先生:可唔可以唱兩句《無條件》畀我聽呀?

Eason:「當潮流愛新鮮,當旁人愛標籤」

6.王小姐:你最近有冇買CD?有邊個歌手推介吓?

Eason:外國買咗Blur《魔鞭The Magic Whip》,本地就盧凱彤《Pillow Talk》、李榮浩兩隻碟都鍾意,楊千嬅、梁漢文又未出,你試吓搵武漢樂隊逃跑計劃,好嘢嚟。

7.李小姐:你個女咁靚,如果佢帶男仔返屋企叫你Uncle,你會點反應呀?

Eason:多謝先呀,叫我Uncle我覺得啱,唔通叫我哥哥,叫我Uncle都幾有禮貌。

8.蕭小姐:你扮鹹(譚)校長同張學友咁叻,你仲識扮邊個呀?

Eason:(抵死地)邊個叫鹹校長?我其實幾鍾意扮郭富城,通常都係圍內,好欣賞佢仲係咁fit,同埋佢啲歌真係幾好聽。

9.黃小姐:你瞓覺有冇鼻鼾㗎?

Eason:我真係唔知,聽聞有,都幾大聲。

10.梁先生:你認為一段關係點先係無條件?

Eason:我個人好少有條件,唔識答,我冇乜要求,簡單咪得囉,唔好諗咁多。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載