› 選擇地區
三藩市
紐約
洛杉磯
其他美國地區
香港 台灣 北美
 
2015年06月13日

未婚夫前妻要脅攞錢禁女聯絡
翠翠:Raymond盡晒責

港姐出身的葉翠翠於感情路上向來都多波折,直到去年遇上建築師兼公司副董事男友周曉東(Raymond)後便火速熱戀,雖然男方已離婚兼育有一女,但兩人拍拖不足一年便閃婚,今年2月在微博宣佈婚訊,下月11日將在四季酒店擺酒。日前翠翠在微博大晒喜帖,坦言踏入最後階段,為將做人妻而心情緊張之際,前日下午本報收到有人以「削減生活費,棄見親生女」為題報料,還附上一個家事法庭檔案編號佐證。

「離婚時已分咗身家」

事後本報向翠翠求證時,她一直未有回覆,直到昨日凌晨時分,她才語帶無奈表示事情十分複雜,她說:「其實成件事真係好無辜,佢哋喺09年離婚,法庭判咗佢(Raymond)要畀一個數,一路都相安無事,去到舊年9月,我哋出街俾人影到出咗雜誌,佢做空姐嘅前妻失咗業幾個月,所以佢一見我哋拍拖,即刻話:『你𠵱家有錢要畀多啲啦,有錢媾港姐嘛!』,Raymond覺得佢失咗業,嚟緊嗰個月已經加咗畀佢。」
翠翠續說:「但係大家有個協訂,如果佢搵返嘢做,就唔會畀多100%,喺今年5月我哋發現佢喺12月已經搵到工,咪問佢點解搵咗工唔講?我哋咪畀番09年法庭判咗嗰條數,點知佢前妻即刻沒收咗個女嘅電話,唔俾佢同Raymond聯絡,仲發律師信話要告我哋,要求我哋要畀多200% 生活費,佢哋離婚時已分咗身家,一筆過畀咗前妻。」

「為咗小朋友冇所謂」

翠翠表示Raymond前妻經常以「會爆大鑊」去威脅要錢,但翠翠表示Raymond每個月都畀足錢,有單有據,亦不知其前妻下次又會以甚麼做威脅發出錯誤訊息,所以覺得應該說出來,翠翠還說:「佢前妻𠵱家都有男友,係一個出名嘅廚師,我覺得佢專注力應該喺佢自己family,而唔係喺我哋個family, 大家離咗婚咁耐,點解大家唔可以有新生活?佢又唔俾個女嚟同我哋見面,收咗個電話,又搵工人睇住佢,𠵱家冇咗聯絡,只可以等小朋友打畀我哋!」
直言「超級無奈」的翠翠還說:「Raymond都盡晒責任, 買乜嘢都要佢一個人畀晒,為咗小朋友冇所謂,唔好成日要100%多啲,唔畀就爆大鑊咁。」力撐未婚夫的翠翠,昨日下午現身銅鑼灣利舞臺整頭髮,大約一小時左右便離開,未知是否一次過吐盡心聲,所以心情尚算不俗,在店舖望一望櫥窗便到停車揚揸車離開。
採訪、攝影:何慧斯、徐錦池

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載