› 選擇地區
三藩市
紐約
洛杉磯
其他美國地區
香港 台灣 北美
 
2015年06月13日

【我Q你答問會】要着碎花薄睡衣
祖兒:但我食嘢好麻甩

8.羅小姐:平時着乜瞓覺?睡衣、睡袍定內衣?

祖兒:我好注重睡眠服飾,瞓覺一定換睡衣,有少少碎花粉紅色棉質薄薄哋,好多睡衣都着到橡筋鬆晒,因為着咗好多年先舒服,我嘅睡衣好靚喺日本買。

相關新聞:【我Q你答問會】人人問祖兒幾時結婚兼生B?

9.李小姐:我好想你幸福,幾時結婚呀?

祖兒:我諗一定唔會係呢一兩年,畀自己一個期限,38歲,睇自己做唔做得到啦。

10.Ice:你想生幾多個BB?

祖兒:想生一個夠啦,想生女,不過通常想女都係得仔,頂籠兩個。

11.陳小姐:去卡拉OK最鍾意唱邊個歌手嘅歌?

祖兒:王菀之啦,仲有孫燕姿、張惠妹、鄭秀文、楊千嬅,幾乎個個都會唱,就係唔會唱自己歌。

12.Iris:你下次個人演唱會係幾時?

祖兒:𠵱家都未知,人生好精采呀,嚟緊9月會同李克勤做咗先啦,自己嗰個就未知……都嚟支持下啦!

13.李克勤:喺演唱會唱唔唱《舊歡如夢》?會嘅話點樣演繹呢?

祖兒:細心諗過真係要唱係乜形式,可能美式啦啦隊或擋不住的風情嘅裝束去唱,歌本身冇問題,但要諗新鮮包裝,呢個係我底線,如果諗到好包裝方法,《舊歡如夢》放馬過嚟,唔驚你。

14.關先生:你試過一日食最多同最少係乜?

祖兒:我係一個飲食好唔女仔嘅人,鍾意食嘅嘢大家唔好誤會係甜品,最鍾意食同食到收唔到口係花生、開心果,食到成座山咁,自己覺得好麻甩。

15.文小姐:你同克勤個騷叫乜名?

祖兒:實在太多選擇,我唔想用人名砌出嚟,我想用英文名,克勤想用中文名,暫時結論容祖兒加李克勤演唱會就算嘞。

16.劉先生:你鍾意食乜點心㗎?

祖兒:叉燒包囉、蝦餃,飲茶必食。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載