› 選擇地區
三藩市
紐約
洛杉磯
其他美國地區
香港 台灣 北美
 
2015年06月17日

52歲轉行賣保險
江華克服情緒低谷:珍惜當下

【《蘋果》專訪】現年52歲的江華,從影以來先後拍過不少劇集,其後因為在劇集《西遊記》中演唐三藏而走紅,不過最近十年他淡出幕前,原來當年因為腰患而影響生活,情緒一度出現壓力,反思過後,最後走出陰霾。為承諾而加入保險行業的他,直言每天努力學做人,「凡事謝恩,珍惜當下」更成為他做人的座右銘。

相關新聞:當劉華劉江華劉江兄弟

被喻為「比劉德華更加劉德華」的江華,06年有傳他因腰患導致抑鬱症而停工休養,在鏡頭前消失了近十年,江華最近被讀者經本報「爆相爆片」,發現他轉投保誠做保險。久違了的江華,昨日在沙田接受《蘋果》訪問,雖然他依然保存比「比劉德華更加劉德華」的感覺,不過言談間似乎少了一份執着。
對於當年被傳患抑鬱症,他笑着否認說:「傳聞嚟啫,當年拍完《紅拂女》喺北京宣傳,我發作得好嚴重,腰腿出現嘅問題,導致我精神好有壓力,以前諗都唔諗呢啲事,點解一個人行得走得食得瞓得,突然間會變成乜都唔得?嗰陣我習慣咗無論係坐呀、行呀、企呀,十項全能乜都係控制喺自己手度,但係突然做乜嘢都唔得,慢慢就有好多恐懼,跟住又開始諗,我係咪一世都係咁?我好驚,好擔心之後會唔會癱,咁我老婆同仔點?會唔會搵唔到食?」

「軟弱時有好多恐懼」

腰患令江華曾經變得好灰,不過他從而反思人生,他說:「嗰一役話你知,對唔住,原來好多嘢唔係你可以決定,有幾多錢又點?幾有才華同幾多人鍾意又點?有啲嘢可以令你乜都冇,我覺得搞唔清楚究竟人生係點?一個人喺軟弱嘅時候,會有好多恐懼襲擊你,之後我信咗耶穌,喺嗰段日子我唔想再拍戲,要調較自己生活,反思人生係乜,直到今日好似有一種起動感覺。」
經歷過後,江華直言目前的生活開心又感恩,他說:「其實你抬頭望一望個天,你會發覺自己實在好渺小,做人有幾叻啫?生老病死又唔可以控制到,我𠵱家有八個字成日提醒自己『凡事謝恩,珍惜當下』,呢個先係最重要,未發生嘅嘢都冇人知,諗嚟都多餘。」慢慢地江華開始想通了,他說:「我喺靜咗呢十年裏面,我學識咗反思,體會咗好多嘢,人生開心唔係好難,只係我哋唔明白,我亦唔知邊一日會再出發,所以籌備咗好多嘢,學識修心養性,從唔同角度去思考,去學習,真係得着好多。」

相關新聞:人物誌:憑《九五至尊》贏獎攀高峯

從沒有放棄拍電影

江華強調自己從來都沒有放棄搞電影,一直有跟投資者傾談,今次加入保險行業,原來背後有一個故事,他說:「我相信每一件事嘅出現,都有佢嘅美意。我有一個好耐冇見嘅朋友,有一日突然搵我見面,食飯嗰晚我問佢做保險做得好唔好,佢話由我識佢嗰日做到𠵱家,連續十年都係頭五位,不過佢話佢嘅團隊只係得佢自己一個,於是問佢點解唔搵人加入,最後傾傾吓佢話如果我肯加入,就會搞團隊,所以咪因為呢個承諾而加入保險。」似乎感覺冥冥中有安排,他笑說:「梗係啦,如果唔係無端端會做保險,不過我諗嘢同其他人有啲出入,主要唔係叫人去買,反而係主動同人做朋友,想識多啲人,呢個係我自己睇法。」
採訪:何慧斯
場地:沙田凱悅酒店

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載