› 選擇地區
三藩市
紐約
洛杉磯
其他美國地區
香港 台灣 北美
 
2015年06月20日

【星星點評】嘉玲影壇點將錄

在娛樂圈出道超過30年的嘉玲,曾經與無數當紅男演員拍檔演出,粒粒巨星都有獨特之處,對於這些拍檔,嘉玲各有評價!

相關新聞:嘉欣同慶生辰

【評】梁朝偉:

「香港人嘅驕傲,佢嘅作品可以入電影資料館,咁講唔係因為我係佢屋企人,我係作為觀眾去講,覺得香港有咁嘅演員值得光榮。偉仔係天生有一種面對鏡頭時會有獨特魅力。佢係好認真投入每部戲,對自己要求好高,好享受去演繹每個角色,係上天畀咗天賦佢。」

【評】周潤發:

「同發哥拍完《賭城風雲II》,簡直愛上佢,佢係一個寶,一本百科全書,係一本好豐富嘅字典,不單戲好,又識教人點養生。喺拍戲現場,只要有佢喺度,氣氛會好好,同佢演戲,佢會令到對手好舒服放心,完全冇壓力。」

相關新聞:Liddy首爆父遺言

【評】周星馳:

「怪人一個,簡直拍得住個我老公,戴住個口罩去首映、成日踩住單車周圍去、成頭白髮又唔打理,但佢真係一個好特別人,係有才華創作者,演戲節奏好好,有好多瘋狂諗法。創作係需要激情,可能要排除好多世俗嘢,佢係唔正常嘅,但佢嘅唔正常,喺佢電影入面就係正常。」

【評】張國榮:

「佢係一個明星嚟!好脆弱一個人,好敏感、冇安全感,要求極度完美,但呢個世界冇可能每一次都滿足到你。同佢一齊好開心,佢會話畀你聽乜嘢係靚,喺拍攝現場佢會令到氣氛好和諧。私底下我哋會行街、打牌同去party,佢教我點樣做一個女人,我覺得佢女人過我囉,哈哈!」

【評】劉德華:

「華仔係一個模範,好勤力、認真,交足功課,當然係靚仔一名。佢都係有無限可能性,又做製作人,一時又同寫劇本嘅人傾偈,好支持年輕導演開戲,對社會同呢個行業都係有責任心。」

【評】劉青雲:

「我同佢係同一期訓練班出嚟,佢個人好低調、誠懇,佢到𠵱家一樣係保持沉默個性,但佢好認真面對每一個角色,演技係越來越成熟同立體,塑造出嚟人物好豐富,可以打入你個心。」

【評】梁家輝:

「家輝都係非常之絕,佢塑造每個角色都係好出色,我同佢合作最多,兩個人熟絡到已經好有默契,佢直頭知道我邊度kick住咗,話畀我聽可以咁講,但佢又唔係一定要我聽佢,係可以有商有量,又會捉住我對劇本同改劇本,喺現場佢好照顧我,連走位都提埋我,正式拍時會護住我。」

【評】張學友:

「我叫佢唔好淨係記住唱歌,佢話唔唱歌會死,唔演戲OK!其實佢同梁生(偉仔)演嘅《阿飛與阿基》、《東成西就》都好好笑,佢做喜劇節奏感都幾好,我相信一個唱情歌可以唱到咁出色嘅人,唔會演唔到感情戲。」

蘋果20年 企硬我敢言
http://20.appledaily.com

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載