蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年06月26日

有話兒:陳奕迅 碟碟不休

【《蘋果》專訪】陳奕迅(Eason)走過41歲的年頭,過去20年的歲月如歌,成就了現在的天下無雙。《蘋果》一連兩日刊出Eason的專訪,他由音樂到家庭都吹不停。走過唱片業高山低谷的Eason,面對唱片工業步入夕陽無限好的殘酷現實,Eason依然堅持要出唱片、買實體CD,他坦言:「其實唱片係難做,但呢個係情意結!」
撰文:余燕儀

相關新聞:𠱁霆鋒作曲 大讚獨特

入行20年的陳奕迅,曾是全年最高銷量歌手大獎(男歌手)五連霸,現在卻越來越少人買實體CD,改為上網買歌下載,連Eason都曾誤以為《THE KEY》專輯在台灣僅得900張銷量,令他戲言要退出樂壇。面對唱片步入夕陽工業的殘酷現實,Eason不禁說:「其實出唱片係難做,不過呢個係情意結,自己鍾意出大碟。以前黑膠唱片封面都大啲,有海報有歌詞,感覺:嘩!有經過心思去做嘅美術,唔係求求其其,我係執着同欣賞,所以繼續出碟,包括嘅唔只音樂上品質,仲有美學上品質。」
問上次自己用錢買的是甚麼碟?Eason說:「好似我咁嘅70後,始終會買隻碟,但未必會聽,近期咪買盧凱彤、岑寧兒,實體CD我成日都仲有買,因為屋企仲有位擺。一定會買嘅有王菲,仲有張學友,因為keep住由學友第一隻儲到𠵱家,另外會買何超儀嘅碟,呢個真係好friend。」

「聽歌應該用喇叭」

隨着環境轉變,樂迷聽歌的方法都不同了,Eason說:「我都有上iTunes買歌,譬如楊千嬅《最好的債》、梁漢文《一路走來》,自己friend咪會撐,麥浚龍同莫文蔚合唱好聽都有買,我都有問囡囡(康堤),佢呢個年紀畀coupon買歌仲開心,佢哋平時就咁喺iPad聽,我話唔係呢,聽歌應該用喇叭,唔知20年後CD會唔會被淘汰?咁都冇辦法!」
如果要揀一首歌代表自己,Eason會揀《浮誇》,他說:「唔夠膽話係代表作,但無論星馬泰美加澳紐內地台灣韓國,全部都想聽《浮誇》,證明呢隻歌好勁。」近年K-Pop大行其道,能否接受這類歌?他坦言:「有啲囉,孝琳唱《來自星星的你》片尾曲,我鍾意佢把聲沙沙哋好通透。J-Pop我都唔多聽,都係椎名林檎、玉置浩二。」問會否抗拒洗腦歌?他愕然問:「唔知乜喎!死啦!覺得自己好out呀,係咪90年代魚蛋歌快靚正嗰啲,咁難頂嘢我通常唔會頂得住。」
現在名成利就的Eason,會否有日宣佈唔攞獎?他說:「應該唔會宣佈,唔攞咪唔去囉。記得《重口味》嗰年我有去,因為我覺得要宣傳隻碟,我已經好多年着到好特別,盡量搵新鮮造型參加頒獎禮,我反而想帶埋隊band嚟,如果佢話唔得,大家達唔到共識,咁我寧願去第二啲地方宣傳,我好慶幸自己有得選擇。」問今年會否參加頒獎禮?他說:「唔知喎,我只知12月仲走緊巡迴,根本心態唔會諗呢啲。」

相關新聞:包裝薄衣衣 點會有人買?

歌手出賽為證明自己

紅館是歌手的目標,當紅歌手更連開十多廿場,但狀態卻未必每場都好,有觀眾甚至用探病形容睇騷,Eason在紅館共開過90場演唱會,前年連唱25場破自己紀錄,對此他說:「係咪我都喺裏面呢?我都試過病,但我又冇甩場。我好得意㗎,之前嗰個tour(2010年《DUO演唱會》),我把聲係好沙,但我有第二啲嘢令觀眾睇得開心,上次好似愧對觀眾做得唔好,今次25場都有感冒,但好開心把聲冇事。」
對於歌手如古巨基、陳潔儀、黃貫中、G.E.M.(鄧紫棋)等參加內地歌唱比賽節目,Eason有甚麼看法?他說:「我當年參加新秀,想專業評審證明自己得唔得,其實係一個信心訓練,《我是歌手》都係一樣心態,我諗佢哋想重新證明自己係唱到歌嘅歌手。其實內地好多比賽,我都做過導師,係咪贏唔係最重要,究竟你想做專業歌手,或喺幾億人面前亮個相?只可以奉勸一句,未必次次得到你想要結果,如果玩玩吓自然會被淘汰,筲箕就會筲出去。」
髮型:Derek Li of Xenter
化妝:Karry Wong

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載